Indian sipaiten drone nunchan zirna lian ber huaihawt dawn

Indian sipaiten drone nunchan zirna lian ber huaihawt dawn
Pakistan nena tun hnaia an indonaa ralkhat atanga thunun theih ralthuam, unmanned aerial systems (UAS) an hman nasat hle hnuah Indian sipaite chuan thla tharah hian drone leh counter drone system an enchhin dawn a, nunchan zirna lian tak an buatsaih dawn tih sipai hotu lianin Thawhlehni khan a sawi.
Inthenawm ram hnih hi ni li an indo chhungin drone hmangin an inbei nasa hle a, hei vang hian India pawhin drone ralthuam lamah tan a la thar nasa zual a, van sanga inbeihnaa hmanraw tangkai a ni tih a hre chiang lehzual tawh.
India hian ama kut chhuak ngei air defence system, ‘Sudarshan Chakra’ tia an sawi chu kum 2035-ah siam chhuah hman a tum bawk a, hei hi Israel-in a chhuan em em, Iron Dome nena inang reng tur niin an sawi nghe nghe.
Indian military hian ‘Cold Start’ tia an vuah nunchan an zir tur hi drone war games lian ber tur niin October chawlhkar hmasa berah an nei dawn a, defence industry hotu lian leh zir bing mite pawh an tel dawn niin Integrated Defence Staff Deputy Chief Air Marshal Rakesh Sinha-a chuan a sawi.
“Nunchan zirnaah hian kan drones leh counter-drone system-te pawh kan enchhin dawn a… air defence system leh counter-UAS pawh kan siam thei dawn bawk a ni,” tiin New Delhi-a thil tih khawmna hmunah a sawi a ni.
Indian hotu sang pakhat chuan tun tum drone nunchan zir tur hi Pakistan nena an intihbuai hnuai tual chhunga nunchan zirna lian ber a ni dawn tih a sawi a, May thlaa indonaa drone hmanga an inbeihna pawh kha a takin an chang chhuak leh dawn tih a sawi bawk.
Drones leh counter-drone system hi India-in Sudarshan Chakra air defence system siam a tuma a bultumtu pakhat an ni a. Nunchan zirnaah hian thlawhna leh counter hypersonic system te pawh an tel dawn tih Integrated Defence Staff chief Air Marshal Ashutosh Dixit-a chuan a sawi.
“Pakistan pawh an inbuatsaih a, a tha zawkin an inthuam mek zel a. Keini hi an aia tha zel kan ni,” a ti bawk.