Indian Sr. Men National Basketball Team Manager R. Lalnunpuia

FIBA World Cup 2027 Asian qualifier khelh turah Mizoram Basketball Association (MBBA) President Pu R. Lalnunpuia chu India rama basketball inrelbawlna lama thuneitu sang ber, Basketball Federation of India (BFI) chuan Sr. Indian national basketball team manager turin a ruat.
June ni 29, 2026 hian India leh Lebanon te chuan Zouk Mikael, Lebanon-ah World Cup khelh tuma an zin kawngah hian an inhmachhawn dawn a ni.
Pu R. Lalnunpuia hi tarlan tak angin MBBA President ni lai mek a ni a, an chhungkua in Leitanah an cheng. June ni 25, 2026 hian Mizoram chhuahsanin Indian camp, Bangalore a pan ang. Ani hi Zofate zinga Indian Sr. Men Basketball National Team Manager hmasa ber tur a ni.
The Aizawl Post Hoops Mania zawhna chhangin Pu R. Lalnunpuia chuan, “India hian Lebanon hi kan la hneh ngai lo va, hetia manager dinhmun han luah ve dawn takah chuan hneh ngei a chakawm hle; hetiang mimal mawhphurhna ka chelh theih chhan hi Mizoram basketball than theihna tura tha thawh zawng zawngten kan thawhrah a ni e” tih a sawi.
Kum 2015 khan kha tih laia MBBA General Secretary, Lalrinfela (Republic) chu 4th. FIBA Asia U-16 Championship for Women, Indonesia (Medan) a khelhah Manager mawhphurhna hi a lo la tawh nghe nghe.
Hun hmasa lamah Sr. Indian national basketball team-ah hian Mizo basketball legend H. Laldinsanga (Saron) chu player leh coaching staff-ah a lo inlan tawh. Ani hnu lamah hian Lalrina Renthlei (Tuikhuahtlang) chu Indian national team tan hian a lo khel ve tawh bawk.
Anni pahnih bakah hian Vanlalthazuala (Bungkawn) chu Sr. Indian Men team lamah tum hnih zet camp turin koh a lo ni tawh a, Emmanuel VL Awmpuia (Nursery) pawh Jr. Indian national team camp-ah vawi khat koh a lo ni tawh nghe nghe.