Indo-Bangla ramria ‘no-man’s land’-ah mi pakua tang, sipai inbia
Assam-a Mankachar sector-a India leh Bangladesh ramriah inhnialna a la awm a, Bangladeshi pakua chu ram pahnih inkara ‘no-man’s land’ huam chhungah an tang a, sipaite an indawr zui mek.
Thu dawn danin Border Guard Bangladesh (BGB)-te chuan an mi leh sate hi an pawm duh lo niin an sawi.
Buaina chinfel nan hian Border Security Forces (BSF) leh BGB te inkarah flag meeting neih a ni a; mahse, thuneitute chuan he inbiaknaah hian thil sawi fel a ni lo nia sawi a ni a. Thawhtanni khan an inbe leh niin BSF thuchhuah chuan a tar lang bawk.
Pathianni khan ramria no-man’s land-ah mi pakua an tang tih hmuh a nih hnuah Mankachar-ah India leh Bangladesh ramriah inepna boruak hi a awm tan.
Video darhah chuan an zinga pakhat chuan Bangladeshi an nih thu leh hnathawh tur neia India-a kal an nih thu a a sawi tih hriat a ni a. “Bangladesh atanga lo kal kan nihzia finfiahna tur document kan nei a, min thatin luiah pawh min paih a nih pawhin India-ah kan kal dawn lo,” a ti.
Video dang eng emaw zatah chuan an awm zel dan tur an hriat theih loh avangin mangang takin an an tap tih a lang bawk.
BSF hian tun hnai khan Bangladesh mi eng emaw zat, India ramri pelh tumte chu an nawr let tawh a. Kar kalta chhung khan Assam Police leh BSF-te chuan mi 21 an lo dang tawh a ni.
Chief Minister Himanta Biswa Sarma chuan police leh BSF-te chu a ruka ramri kân tum dan leh venna kawnga an thawhhlawk avangin a fak hle.
Pathianni khan X-ah, “Ramri humhalh, venhimna tihchaknaa Assam Police leh BSF thawhhona tha tak hmangin ramri kân tum 21 chu rang taka hriat chhuah a ni a, India luh phalsak an ni. Kan ramri humhalh kawngah hian kan bei zel dawn a ni,” a ti.
Sarma hian Bangladesh atanga dan lova lut lova Assam chu fihlim turin a ngen bakah ramri nei ve dang thenawm state-te ramri venhimnaah tan la zual turin a phut bawk.
India leh Bangladesh hi hmarchhaka Tripura, Assam, Mizoram leh Meghalaya-ah an inri a, West Bengal nen an inri bawk a. Ram pahniha ramri vengtute hian tun hnaiah dan lova inluhpawh a awm lohna turin tan an la thar nasa hle a ni.