Indo hnua Ukraine civil mite tawrh nat ber kum thleng
Indo hnua Ukraine civil mite tawrh nat ber kum thleng
Kum liam ta kha kum 2022-a indona a chhuah hnua Ukraine-a civil miten an tawrh nasat ber kum a ni a, ramriah inbeihna a nasat bakah Russia-in hmun hla zawk kap thei ralthuam a hman tam tak vang niin United Nations Human Rights Monitoring Mission in Ukraine chuan a sawi.
Thawhtannia report a tihchhuahah ‘kum 2025 chhungin Ukraine-a civil mi 2,514 vel thiin 12,142-in hliam an tuar a, kum 2024 aiin 31%-in an tam zawk a, kum 2023 ai phei chuan 70%-in an tam’ tih an tar lang.
Russia-Ukraine indova thi leh hliam dinhmun hi Russian sipaiten Ukrainian sorkarin a thunun chin ram an beihnaah an tam ber niin report-ah hian tar lan a ni bawk.
Russian sipaiten kum liam taa ram lak tuma beihpui nasa zawk an thlakah civil mi thi leh hliam an tam phah hle a, hmunhma pawimawh tak tak chhiain ni tin mamawh thil a harsat phah a, ramri chhehvelah baihvaia awm an tam phah hle nia sawi a ni bawk.
Kum liam taa thi leh hliam hmun thuma thena hmun hnih vel hi ramri hrula mite niin an chenna khua chhuahsan ve thei lo upa zawkten an tuar ber a. Hmun hnai zawk kahna chi ralthuam avanga civil mi tawrhna pawh a pung hle tho nia tar lan a ni.
“A viltututen an hmuhah chuan ramri hrula inbeihnaa tawrhna a thlen nasat bakah hian hmun hla zawk kap thei ralthuam hman a nih nasat tak avangin ram ril zawkah pawh tawrhna a nasa a, ram pumah civil mite dinhmun hi a derthawng a ni,” tiin UN hnuaia thlithlaitu hotu, Danielle Bell-i chuan report a tlangzarhnaah chanchinbu mite hnenah a sawi.
Indopui II-na hnu lama Europe-a indona lian ber ni mekah hian lehlam lehlam hian sipai pawh an chân nasa hle tura ngaih a ni a, a zat chiah erawh hriat theih a ni lo.
UN chuan civil mi 15,000 dawn thi tawh angin a chhinchhiah a; mahse, ‘a tak taka a zat chu hei aia a tam a rinawm’ tih report-ah hian an ziak a. Russian-te luah chin ramah thil thleng a hriat tak tak theih loh avangin a zat dik hriat theih a ni lo niin an sawi.
Kum 2022-a indona a chhuah hnuah Ukrainian civil mi sang tel an thi tawh a. Indo kum khatnaah Russian-ten Mariupol lawngchawlhna lain khawpui pawh an suasam hle a, ramri hrul dangah an lut zui zel a ni.
Hemi hnu atang hian Moscow hian Ukraine ram kah nan missile leh drone a hmang zui nasa a. Civil mi an tum ngai lo ti mah se Ukrainian mipuite hman hmunhma tam tak an tichhe thung a ni.
Ukraine pawhin Russia leh Russian-ten an ram an awpsakah mipui hmunhma an bei ve tho va; mahse, an che na lo hle thung.
Hetih lai hian Russia chuan nikum khan Ukrainian sipaiten an ram chhungah civil mi 253 thatin 1,872 an hliam niin UN-ah a hrilh ve bawk a. Hei hi a dik ngei em tih erawh finfiah theih a ni rih lo.