January ni 10 leh ni 11-a Myanmar sipaite’n indo thlawhna hmanga Camp Victoria an beih hnu-ah Myanmar atangin Mizoramah raltlan an luh belh zel a, an luh belhna ber Farkawn-ah chuan mi 300 chuang an lut tawh.
-- Advertisement --
Camp Victoria hi Myanmar-a hel pawl lian Chin National Army hmunpui a ni a, |iau kam Myanmar lama awm, Farkawn thenawm lawka mi a ni.
Farkawn atanga thu dawn danin, an khuaah hian raltlan 346 an luh belh tawh a, chhungkaw 89 an ni. Thawhtanni pawh khan mi engemaw zat an lut.
Farkawn-ah hian nikum lam atangin raltlan an awm reng a, chungkaw 180 chuang an awm sa. Tuna lut tharte pawh hian a lo awm sate an bel a, chhungkaw 10 vel erawh in luahin mahniin an inbawl hrang tih thu dawn a ni.
Farkawn-a raltlante hian a rem rem an thawk a, inhlawhna awm ang anga an inhlawh bakah VC te’n an inhlawhna tur an ngaihtuahpui thin bawk. A hma angin tanpuina hi a lut ruih ruih rawh lem lo nia hriat a ni.
Zirtawpni khan Doctors without Borders, India (DWBI) te’n Farkawna raltlan tharte hi an ni tin mamawh, mutbu, bucket, chawhtawlh leh thil dang engemaw zat an pe a, Village Level Committee On Myanmar Refugees te’n Community Hall-h lo dawngsawngin, heng an thilpekte hi chhungkaw 70 hnenah an sem chhuak nghal a ni.
Farkawn khaw thenawmah pawh lut thar hi an awm a, hriat theih chinah Samthangah chhungkaw pali, mi 17 awmna leh Vaphai-ah mi 13 lut thar an awm.