Indo tihtawp tumna karah Russia-in Ukraine bei zui zel

Indo tihtawp tumna karah Russia-in Ukraine bei zui zel
Ukraine-a indona kal mek chu Washington-ah tihtawp tuma hmalakna a kal mek laiin indona mualah erawh thawm a reh lo hle a, Russia chuan Thawhtanni zan zankhua khan drone 270 leh missile 10 hmangin a thenawm hi a bei leh niin Ukrainian air force-in a sawi.
Ukraine-a energy ministry chuan Russia hian Poltava region lailia tuialhthei thlitfimna hmun awmna energy facility-te an tum niin an sawi a, nasa takin kangmei a chhuah phah tih Thawhlehni khan a puang.
Thawhtanni zana Moscow beihna hi tun thlaah chuan a nat ber tum a la ni a, a hma ni chiahin US President Donald Trump-a’n Ukrainian President Volodymyr Zelenskyy leh European hruaitute chu White House-ah mikhualin muanna a awm theihna turin an inbia.
Russia leh Ukraine hian a hmaa Turkiye-a an inbiaknaa an lo inrem tawh angin Thawhlehni khan sipai thi ruang eng emaw zat an inhlan tawn leh bawk.
“Vawiin khan Ukrainian Armed Forces sipai ruang 1,000 chuang kan hlan a, anni pawhin 19 min pe,” tiin Russian president thawhpui, Turkiye-a inbiaknaa Russia aiawha kalte hruaitu ni bawk, Vladimir Medinsky-a chuan Telegram-ah a tar lang.
Ukraine-a Coordination Headquarters for the Treatment of Prisoners of War pawhin sipai ruang 1,000 an dawn thu leh International Committee of the Red Cross-in ruang inhlannaa an puih avangin lawm thu an hrilh bawk.
Moscow leh Kyiv hian Istanbul-a May 16, June 2 leh July 23-a an inbiak tum khan indonaa sipai an inthahsakte ruang inhlan hi an remti a, inbiakna hi muanna atana inremna siam tuma ruahmanna ni mah se ruang inthleng bak hi an thleng zo lo.
Kartawpah khan Trump-a leh Russian President Vladimir Putin chu Alaska-ah inbiain hei hi indo tawpna atana rahbi pawimawh taka ngaih a ni a, a hnuah Trump, Ukrainian President Volodymyr Zelenskyy leh European hruaitute chu Thawhtanni khan Washington-ah an inbe veleh bawk.
Muanna a awm theih nana indawrnaah hian a bulpui ber chu ram inthleng leh Ukraine himna a ni.
Ukraine leh an European thawhpuite chuan muanna a awm theih nana inbiak chhung hian inkahhai puan ni se an duh bawk.
Russia nena an inremna tur hian Ukraine chuan nakin zela Kremlin sipaite beihna laka himna an duh tel a. Hemi awmzia chu Zelenskyy-a hian Ukrainian sipaite chu khawthlang rama an thawhpuiten ralthuam leh training an pek an duh tihna a ni.
Trump-a chuan himna pek a tum a; mahse, a sipaite tirh kher erawh a tum lo.
Russia chuan hetianga Ukraine puih hi a duh lo va, Kyiv-a NATO sipai dah pawh a duh lo bawk.
Zelenskyy-a leh European hruaituten Putin-a’n Ukraine khawchhak lama industry tamna, Donetsk leh Luhansk awmna, Donbas region chan a tumna chu an lo ve thung bawk a. Heng hmun hi indo nasatna hmun niin Russian sipaiten hmun tam tak an la awm a, an la thunun kim thei lo thung.
Trump-a chuan Thawhlehni khan Putin-a hian indo titawp tura hma lam a pan dawn thu a sawi a; mahse, Kremlin hruaitu hian inremna siam nghal mai chu a thei rih lo tih a sawi a. Chawlhkar tam vak lo hnuah thil a chian tur thu a sawi a ni.