Indona avanga baihvaite awmna beihnaah tam tak thi
Sudan-a North Darfur state-a tual chhung indona avanga baihvaite awm khawmna hmun beihnaah mi tam tak an thi ngei nia hriat a ni.
Paramilitary Rapid Support Forces (RSF) chuan Thawhlehni khan el-Fasher khawpui daia baihvaite awmna, Abu Shouk-a bazar lun tak chu darkar hnih vel an bei niin tual chhung thuneituin a sawi.
Camp-ah hian mi nuai nga vel awmin bazar beihna hi ni thum chhunga a vawi hnih thlenna a ni.
El-Fasher hi Darfur-ah chuan sipaiten an thunun khaw lian awm chhun a ni tawh a, hei vang hian RSF hian kum khat dawn an bei tawh.
Thawhlehnia Abu Shouk an beihna hun hi bazar lun vanglai tak a ni a. Camp-a awm tam zawk hi Muslim niin Ramadan thla an hmang mek a, mi tam takin nilenga chaw an nghei hnua an ei tur lama an bazar vel lai a ni.
Laipuia kah an ni a, hliam tam tak, thenkhat na vak lo leh na tak tak an awm niin el-Fasher-a damdawi in la ding awm chhuna mi, Dr Ibrahim Nadyan chuan BBC a hrilh.
Abu Shouk hi Pathianni khan RSF hian laipui thovin an lo kap pawh a, civil mi paruk an thi niin tual chhunga damdawia thawkte chuan an sawi.
RSF hian Pathianni leh Thawhlehnia beihna thlengah hian engmah sawi an la nei lo thung.
Indona avanga baihvaite awmna beihnaah tam tak thi
Get real time updates directly on you device, subscribe now.
Next Post