Sipaiin bomb a thlak palhah mi pasarih hliam

Sipaiin bomb a thlak palhah mi pasarih hliam
South Korea-a sipaiten nunchan an zirnaah civil mi chennaah tihpalh thila bomb pariat an thlakah mi pasarihin hliam an tuar a, an zinga pali chu an dinhmun a tha lo hle.
Bomb thlak palhtu hi Air Force KF-16 thlawhna niin North Korea nena an inrina bul lawk, Pocheon atangin Ningani chawhma dar 10:04 (India-a zing dar 06:34) vela thlawk chhuak a ni.
Bomb pakhat chauh a puak thung nia hriat a ni a. A dang pasarihte chu an puak lo nia hriat a nih avangin bomb disposal team tirh luh an ni tih Pocheon thuneituten an sawi a. A bul hnaia chengte chu hmun hima sawn an ni.
Sipai nunchan zirnaah hian hmanraw tak tak hman a ni fo thin a, civil mite chenna hnaia tla pawh a awm thin a; mahse, tuna mi anga hliam tuar an awm phah erawh a awm khât hle.
Tual chhung chanchinbute chuan mi pahnih chuan an nghawng leh dar ruh an titliak niin an tar lang.
“Kan KF-16 (jet fighter) chuan MK-82 bomb pariat a thlak chu kah tur lai tih pawn lamah a thlak palh a ni,” tiin Korea-a Air Force pawhin thuchhuah an siam.
Thil thleng chu pawi an tih thu leh an chhui nghal mek thu an sawi a, a tuartute chu zangnadawmna pek an ni dawn tih an sawi bawk.
Biak in pakhat leh in eng emaw zat a chhe tel a. Tual chhung chanchinbuten thlalak an thehdarhah chuan tukverh chhia leh biak in chung chhiate pawh a lang.
Defence ministry chuan Ningania training hi US sipaiten nunchan an zirhona kal zel pakhat a nih thu an sawi.
South Korea leh US hian March 10 leh March 20 chhungin nunchan an zirho dawn a, hei hi US-a Donald Trump-a’n White House a luah leh hnua a vawi khatna tur a ni a. Hei hi North Korea leh Russia inkara inzawmna thuk tak a awm mek laia tih a ni dawn a ni.
Kum 2022-a South Korea leh US-ten nunchan an zirho tum pawh khan sipaiten ballistic missile an kah chhuah chu kal fuh lovin a bul lawka sipai hmuna golf khelhna hmunah a lo tla tawh a. Missile hi a puak lo hlauh va, a kang nasa hle thung a, a bul hnaia chengte an chiai hman hle a ni.