Indonesia tui lianah mi 900 thi tling tawh

Indonesia tui lianah mi 900 thi tling tawh
Indonesia-a tun hnaia tui lian avanga thi chu mi 900 an tling tawh a, chin hriat loh za tel an la awm bawk.
Chawlhkar hmasaa Malaca Strait atanga cyclone chak tak thawk avang hian Asia chhimchhak ramah hian ruah tam tak thlenin tui lian leh lei min a siam nasa hle a, chenna in 1,00,000 chuang a chhia.
Tlawhpawh theih loh hmunte tlawh theih tura hma lak mek zel niin hmun thenkhatah chuan thlawhna hmangin puihna thlak a ni.
Indonesia-a tui lian hi tun hnaia Asia-a khaw awm dan uchuakin chhiatna a thlen zinga pakhat niin Sri Lanka, Thailand, Malaysia leh Vietnam-a thite nen phei chuan mi 2,000 dawn an ni tawh.
Indonesia-ah hian a tuar na ber zinga mi, Aceh Tamiang-ah chuan khaw thenkhat chu tui lian luang chak takin a la vek.
Lintang Bawah khuaa dam chhuak pakhat chuan mi thenkhat chu an in chungah rei tak an tang niin BBC Indonesian service hnenah a sawi a. Fitriana-i hian, “An fa naupang tetete nena ni thum vel engmah ei leh in lova tang pawh an awm,” a ti.
An khuaa in ding 90% vel a chhia nia sawiin chhungkaw 300 chuan awmna tur an nei tawh lo niin a sawi.
Region governor chuan chhanchhuah hna thawktuten ‘kawng thleng dai ngai’ tui tling karah ruang zawn hna an la thawk mek tih AFP news agency a hrilh.
“Mi tam tak chuan ni tin mamawh thil an mamawh hle a, Aceh-a hmun kilkhawr deuh lai phei chu thlen theih a la ni lo va, mite hi tui lian vangin an thi lo va, riltamin an thi mek a ni,” a ti.
Indonesian chanchinbute chuan lung in pakhata tangte chu an tan in tuiin a chim avangin chhuah an ni tih an tar lang a, thuneitute chuan hmun dangah dah sawnna tur chuang a awm lo niin an sawi.
Hmun pahnih, Sibolga City leh Central Tapanuli pawh khawmual atanga tlawh theih an la ni lo va, Pathianni thleng khan thlawhna leh lawng hmang chauhvin puihna pek theih an la ni.
Hmun thenkhatah chuan dawr rawk pawh a thleng nual tawh nia sawi a ni bawk.