Infiamna hmunhma buatsaih insum rih tum – Minister

Sum indaih lohna karah sawrkar tharin zirna leh mipui hriselna lama insawrbing hmasak a tum avangin sports infrastructure din thar lamah chuan an insum rih dawn tih Sports minister Lalnghinglova Hmar chuan a sawi.
Inrinnia Kawnpui Playground No.2-a phullem phah mek leh Hockey ground a tlawhnaah minister hian hei hi a sawi a. Chutihrual chuan infiamna hmunhma awmsa leh hmalakna kal mek chu tha leh tangkai thei ang bera hman tum a ni dawn tih sawiin, “Sawrkarin a duh ber chu sports infrastructure awm sate infiammiten a nih dan tur angin hmang tangkai se tih a ni,” a ti.
A department enkawl dang LESDE hnuaiah thalai tam zawkin eizawnna an neih theihnan kawng dapin, sawrkar laipui nen indawr a ni tawh tih a sawi a ni.
Kawnpui Playground No.2-a phullem phah hi cheng nuai 600 senna tur niin, a hna pumpui zaa 90 vel zawh tawh a ni. Pavilion leh mipui thutna tur bakah ground sir cheibawl hna chu zawhfel a la ni lo thung.