Inhauh zawhah engtin nge ni ang?

Kawppui te nena inhnial leh inhauh ve deuh bap bap chang hi a awm thin. Zanlamah thinrim engphiarin in inhau a ni thei a, zingah i tho a, engtin nge i tih ang tih i ngaihtuah a. Thinrim zui reng ai chuan engtin emaw tak i tih a ngai a ni. Inbe lo a in ngawihsan reng khan boruak a siamtha chuang si lo va, chuvangin a tu emaw zawk chuan hma inlak a ngai a ni. Hetiang hunah hian inbiak tan leh dan tur hi thiam pawh a harsa ve thin a, tun tumah hian relationship lama mithiam ten a tih dan tur tha ni a an sawi te kan rawn tarlang e.
1. In-text hi kawng awlsam leh tha tak pakhat a ni. I tana a pawimawh zia leh hlut zia te kha a hriat theih nan tawite pawhin text mai rawh, a hriat fo tawh hnu pawh ni se hriat nawn tir leh kha inhauh zawh hnuah chuan boruak siamthar lehna tha tak a ni.
2. Hmaichanna inbiak leh thil han sawi leh vel kha a harsa kan ti deuh a nih pawhin, in-call mai a tha. Inpuh tawnna boruak awm lovin, thiamthu sawi lovin, thiam zawk nih tumna boruak dah thain. Chu chuan in inkar a siamtha leh rang ber ang.
3. A rin loh deuhin eng emaw han ti chhin teh. A wallet/purse-ah te khan ‘min ngaidam rawh’ tih ziakin lo dah ru mai mai chhin teh, a hmuh hunah chuan in boruak a tha lehnghal a ni mai. A eitur duh zawng tak te kha siam sak la, a lawm zawng tur a rin loh tak tih sak la, chu chu boruak siamthat lehna kawng tha tak a ni.
4. Thupha chawi hreh suh. Thinrima min melh sa-la reng ai chuan thupha chawi hreh tur a ni lo. Chapona hian nupa karah boruak tha a thlen ngai lo a, tangkaina a nei tlem khawp. I hmangaih a, ani pawhin a hmangaih che a, nupa dang ang bawkin in inhau ve a ni mai. Chutah chuan boruak chhe tak neih reng kha a hlawk lo a, chhungkaw boruak nuam lo khan a nghawng thui thin. Chuvangin a tlawm zawkah tan hreh tur a ni lo ve.