Inhnialna karah Usyk a chak

Inhnialna karah Usyk a chak
Pathianni zing lam khan Wroclaw, Poland in palian huanga inhnek ngaihven hlawh tak a thleng a. Inhnek hmuhnawm takah champion lai Oleksandr Usyk chuan knockout in a khingpui Daniel Dubois a hneh a, a kawnghren a humhim. Knockout in chak bawk mah se knockout-a tlawm ngei tura ngaih a nih laiin Usyk chak danah inhnialna a awm zui nasa hle.
Palian huanga kawnghren ngaihhlut hlawh pali; WBA, WBO, IBO leh IBF kawnghren kawl khawmtu Usyk hian a kawnghren chuhpuitu Daniel Dubois lakah bul a tan tha a, round ngana tir lam thlengin chak zawk nih phuin a inlan. Round ngana tawp lamah Usyk hi a chesual a, Usyk hnek na zet mai tuar zo lovin a tlu. Dubois hian body shot tha zet neia ngaih ni mah se referee Luis Pabon chuan Dubois hian a hnek hniam lutuk tiin a count lo va, Usyk hi insiamremna hun a pe. Dubois-a’n a hnekna hmun hi low blow a nih leh nih loh chungchangah inhnialna a tam zui viau a. Boxing chungchang hre ril tam tak chuan Dubois hi a kawnghren ruksak ang hiala an ngaih thu an sawi chhuak hlawm.
A khingpui kut thlak na tak a tawrhna atanga a in recover hnuin Usyk a khel tha chhunzawm a, a khingpui a hnek fuh ta fo. Ukranian boxer huaisen Usyk hi a hlauhawm tawlh tawlh a, round kuannah hnehna a chang ta nge nge. Champion lai Usyk hian round riatna tawp lamah a khingpui a hnek tlu a, a chak hman teuh hle. Round riatnaah chak ta lo mah se round kuanaah a khingpui hnek nawn lehin knockout in a chak ta nge nge a, a vawi hnih nan a kawnghren a humhim.
Inhnek vawi 21 hmachhawn a tlawm la nei lo Usyk a chak nawn leh danah inhnialna a tam zui viau a. A khingpui Danniel Dubois chuan rorelna dik a phut thu uar takin a sawi zui a. A hnek tluk hnua a khingpui awm chan chu lem channa ang hiala a ngaih thu inhnek vawi 20 hmachhawn a, a vawi khat tlawmna tawngtu Dubois hian a sawi. Mi tam takin Dubois hian Usyk hi a knockout ngeiah an ngai a. Usyk a hnekna hmun hi a dik leh dik loh chhui chian bakah inhnek nawn leh an phut thu an tlang au pui bawk.
Knockout a Dubois a hneh hnuin Usyk chuan palian huanga kawnghren a kawl loh awmchhun WBC Kawnghren kawltu Tyson Fury hmachhawn ngei a duh thu a sawi a. “Fury hi naktuka hmachhawn tur pawhin ka inpeih a, inhmachhawn thuai thuai ka duh a ni” tiin Tyson Fury hmachhawn a chak et et thu a sawi. Dubois a hmachhawn hma khan Briton lakah a chak a nih chuan Tyson Fury a hmachhawn thei ang tih sawi hmawrhmuh a ni a. Hei vang hian Usyk leh Tyson Fury te an inhmachhawn a beiseiawm thar.