Inhung bikna dan kenkawh khauh a \ul…

Tun hnaiah foreigner mi pasarih chuan PAP tel lovin Mizoram an paltlang a, India ram khawpui pathum Kolkata, Lucknow leh Delhi airport-ah te manchhuah an ni a. He chanchin hi national news platform hrang hrangah a darh nasa a, PAP tel lova Mizoram patlang an nihna pawh uar taka puanzar a ni nghe nghe.
India hmarchhak state zingah Mizoram, Arunachal Pradesh, Nagaland leh Manipur state te hi foreigner ten an tlawh duh chuan Ministry of Home Affairs atangin Protected Area Permit (PAP) an lak a ngai a, PAP tel lovin heng state-ah hian an lut thei lo a ni.
Foreigner mi pasarih an mante hi Myanmar kaltlanga Mizorama lo lut nia sawi an ni a. An zinga pakhat USA khua leh tui Matthew Aaron VanDyke chu indona tualzawla tawnhriat ngah tak lo ni tawh a ni a, Iraq-ah ISIS donaah a lo tel tawh a, Syria tualchhung buainaah te pawh inrawlhin, 2022 atanga Russia leh Ukraine indona lo chhuakah pawh khan Ukranian forces a lo zawm tawh a. Mi paruk dang an mante hi an vaiin Ukrainian mi vek an ni thung. National Investigation Agency (NIA) lamin an puh dan chuan, Myanmar-a helhote ralthuama tanpui leh ramthuam hrang hrang (drone warfare & jamming technology) hman dan training pe tura rinhlelh an ni.
Mizoram kaihhnawihah chuan, PAP nei lovin Lengpui Airport atangin eng tin nge an thlawh chhuah theih? tih chu zawhna lian tak a ni ngei ang. Chu lam chu NIA-in an chhui zui mek a, chanchin chiang zawk a la hriat zui theih mai ang a. Mizoram hi venhimna lamah a inthlahdah chuan India ram security a tichhe thei dawn hle tih tun thil thleng atang hian a lang mai awm e.
He thil thleng atang hian, inhung bikna dan kan neihte hi fir leh khauh (strict) zawka kan kenkawh a pawimawhzia a lo lang chiang leh ta a tih theih awm e.
Kum sawmhnih zet ram buai kan nih hnuah inremna avangin rambuai ni thin kha ram ralmuang a lo ni ta a. Kan ram hruaitute pawhin he remna leh muanna hi chhuang takin an sawi thin a, a uar zualte chuan ‘state ralmuang ber’ an ti hial a. State ralmuang kan nihna behchhan hian sawrkar laipui pawhin ‘Peace Bonus’ te pawh min pe niin an sawi nghe nghe.
He state ralmuang (ber) kan nihna hi khualzinmite pawhin an rawn hmelhriat a, tunhnaiah phei chuan, inkalpawhna lo awlsam (kan sawi ngun ta malh malh hle) tak avangin tourist, domestic leh foreigner an lo luih ruih ruih a ni ber a. Tourist anga inchhal, tourist permit nei, mahse a phena eng eng emaw thil dik lo tih ruk tumte pawh an inzep tel nuk thei ang. Chutiang mi chu an lo awm palh thei tia fimkhur leh chik taka kan mikhualte hi kan lo hriatchian a pawimawh a, ram ralmuang kan nihna behchhana thil dik lo tih tum pawh an inphumru thei tih kan hriat a tul bawk.
Tuna PAP tel lova Lengpui Airport paltlang thei nia sawi foreigner mi pasarih te atang hian Mizoram hian security thilah tun aia kan strict lehzual a tul hle tih a lang a. Kan mikhualte hian lehkha pawimawh neih tur ang an lo nei a nih pawhin, rinhlelhawma khawsa an awm em tih thlenga kan mitmei zui te pawh a tul ang. Thawkkhat lai (kum 7 vel kal ta)-a Mizoram Tourist Police (MTP) dinte kha an la awm zel em? Khangte kha tih lena thuam chak zui atan a tha lo’m ni?
State ralmuang kan nihna hi misualin remchangah an hmang thei a, kan muang sual ang tih a hlauhawm. Inhung bikna dan ILP/RAP/PAP kan neihte hi a nihna tur anga kengkawh tura tan kan lak thar zel a tul. Kan police-te pawh he lam kawngah hian training tha tak pek ni thei se, “Scotland Yard of the Esat” tia koh theih khawpin han inchher chhuak teh se.