Inkahhai atanga ni hnih dawnah boruak a dai tan

Inkahhai atanga ni hnih dawnah boruak a dai tan
India leh Pakistan ramten inkahhai an puan atanga ni hnih dawn a liam hnuah Indian Army chuan Jammu & Kashmir leh hmun dang ramri hrul chu Pathianni zan kha chuan boruak a ziaawm ta hle tih a sawi ta.
Thla hmasaa Jammu & Kashmir-a Pahalgam hmuna mi firfiakte an chet hnuah India leh Pakistan inkar chhiain ni li chhung vel nasa takin an inbei hman a, Inrinni tlai khan inkahhai an puang zui.
“Jammu & Kashmir leh ramri hrul hmun dangah chuan Pathianni zan khan a tlangpuiin a muanawm a. Engmah inkahhai bawhchhiatna thleng hriat a ni lo va, tun hnaia hetiang a nih hmasak ber zan a ni,” tiin sipaiten an sawi.
India leh Pakistan hian Nilaini tuk atanga an inkah hnuah lei, tuipui leh van sanga sipai chetna zawng zawng chu Inrinni tlai dar 05:00 atanga tawpsan vek turin an inrem a. Hemi hnu reilo teah hian Jammu & Kashmir-a Srinagar leh hmun dang bakah Gujarat hmun thenkhatah drone erawh tam tak kah thlak zui leh a ni.
Pathianni zan khan India sorkar hotuin thuthar la khawmtute kawmin Pakistan-in inkahhai kha a hnu lawkah an bawhchhiat nghal thu leh anni pawhin ‘an bawhchhiat milin’ an chhan let thu an sawi.
“India leh Pakistan Director General of Military Operations ve ve inbiaa inhriat thiam tawnna an siam hnu darkar reilo teah khan bawhchhiatna a thleng nghal a, tukin thleng pawh khan a la ni a. Kan sipaite pawhin an rawn tihna hi an lo chhang let ve a, hetiang hi chu inkahhai bawhchhiatna lian tak a ni,” tiin Foreign Secretary Vikram Misri chuan Pathianni zan dar 11:20 vel khan a sawi.
Pakistan chu inkahhai bawhchhiatna thleng thin titawp tura hma la nghal turin a ti a, chuti a nih loh chuan an boruak inep meknaah a pawiin mawhphurtu an ni dawn tih a sawi bawk.
“Kan sipaite chuan uluk takin thil awm dan an thlithlai reng a. International Border leh Line of Control-ah bawhchhiatna a thleng leh a nih chuan a tih let dan tur pawh hrilh vek an ni,” tiin Misri-a chuan a sawi.
Tar lan tawh thin angin India leh Pakistan inkar hi April 22-a khualzinte tlawh nasat hmun, India ram chhung, Pahalgam-a mi firfiakten mi 26 an thah atanga intan kha a ni.
India chuan a ram chhunga thil thleng hi lehlam ram atanga chetna nia sawiin Nilaini khaw var hma khan ‘Operation Sindoor’ tia hming vuahin sipai chakna hmangin a che chhuak a Pakistan leh Pakistan-in a awp Kashmir a kap a, helho tawmna hmun kua a bitum nia a sawi laiin Pakistan chuan civil mi pawh tam tak thi leh hliam an awm tih a puang.
Hemi hnu atang hian ni li chhung vel chu nuclear ralthuam nei ram pahnih hi sipai chakna hmangin an inchhang tawn zui a ni.