Inkahhai kara Israel-in Lebanon a beihnaah mi 12 thi leh

beihnaah mi 12 thi leh
Israel leh Lebanon-a silai keng pawl, Hezbollah inkarah inkahhai puan ni mah se an inbeih chhunzawm zel a, Beirut chhim lamah Israeli-ten vawi sarih lai car an kahnaah mi 12 an thi niin Lebanese health ministry-in a sawi.
Ministry-in a tar lan dan chuan khawpui atanga km 20 vela hla Barja, Jiyeh leh Saadiyat-a tuipui kama lirthei pathumte drone-a an kahnaah mi pariat an thi a, an zingah naupang pahnih an tel.
A chhim lam leh deuh, Sidon khawpui leh Maaliyeh, Chaaitiyeh leh Naqoura khuaa car pali an beihnaah mi dang an thi bawk.
Israeli sipaite hian engmah an la sawi lo va; mahse, chhim lam hmun eng emaw zatah Hezbollah an bei tih a sawi.
Hezbollah fighter-te hian Lebanon chhim lama Israeli sipaite hnathawhna hmun velah drone eng emaw zat an kap ve bawk a, thi leh hliam an awm lo nia sawi a ni.
Thawhlehni khan Lebanon chhim lama beihpui thlaknaa thi mi 13 zingah sorkar enkawl Civil Defense emergency service-a tel damdawi thiam pahnih pahnih an tel niin Lebanese health ministry chuan a lo tar lang tawh bawk.
Thla khat dawn kaltaa US President Donald Trump-a remruat anga inkahhai a puan hnuah ram pumah mi 400 chuang an thi tawh niin an sawi.
Israel chuan tun hnaiah van sang atang leh laipui hmangin beihpui a thlak nasa a, a bik takin Lebanon chhim lam a bei zual a, Hezbollah fighter leh an hmunhmate an beih thu a sawi.
Hezbollah hian Lebanon chhim lam hmun thenkhat luahtu Israeli sipaite leh Israel hmar lama chengte drone, rocket leh mortar hmangin a bei ve bawk.
US leh Israel tang dunin Iran an beihpui hnu ni hnih, March 2 atang khan buaina hi a intan a. Hezbollah hian Israel-ah rocket a kap a, Israel chuan thlawhtheihna hmangin a chhang let a, Lebanon chhim lamah sipai a tir lutin a bei bawk.
Hemi hnu atang hian Lebanon-ah hian mi 2,896 an thi tawh niin health ministry chuan a sawi a. Israeli thuneitute chuan hemi hun chhung vek hian sipai 18 leh civil mi pali an thi tawh niin an sawi ve thung.