Inkahhai karah US leh Iran inbeih chhunzawm
US leh Iran inkara inkahhai derthawng tak chu fiahin a awm mek zel a, American sipaite chuan Iranian drone leh radar hmunte an bei leh a, Iran pawhin Gulf-a US awmhmunte missile hmangin a kap bawk.
US sipaite chuan Iran-in Strait of Hormuz lam hawia Iran-in drone pali a kah chhuah avangin Inrinni khan an beih thu an sawi a, Iranian chet dan chu tuipuia lawng kalte tana hlauhawm a nih thu an sawi a. Drone-te hi kah thlak a ni tih US Central Command (Centcom) chuan a sawi.
Tehran chuan US-in beihpui a thlak chu ram pahnihte inkahhai thuthlung bawhchhiatna ‘langsar tak’ a nih thu a sawi.
Iran hian a chhang let nghal a, Kuwait-a US air base pahnih leh Bahrain-a US Navy hmunhma chu ballistic missile hmangin a kap niin Iranian news agency Irib chuan a tar lang.
Bahrain leh Kuwait-te chuan pawikhawihna thleng hi an dem ve ve a, drone leh missile kah chu hlawhtling takin an lo dang niin an sawi.
Centcom chuan Gulf ram pahniha Iran-in missile a kah pasarih zinga paruk chu an lo dang a, pakhat chu a tum a thleng lo tih a sawi.
United Arab Emirates leh Qatar-te pawhin Iran-in Gulf-a an thenawm ramte beihna chu an dem hle.
Iranian foreign ministry chuan thuchhuah siamin Sirik leh Qeshm thliarkara radar hmunte US-in a beih chu inkahhai bawhchhiatna langsar tak a nih thu leh, ‘Islamic Republic of Iran ram thuneihna leh ramri chin beihna’ a nih thu a sawi.
Thuchhuah chuan, “US chet dan hian khawvel huapdan leh United Nations Charter principle a ngaihthah vek tih a tilang a ni,” a ti bawk.
Iran Islamic Revolution Guard Corps (IRGC) chuan American-te beihpui thlakna phuba lakna atan ‘hmêlma hmunpui’ an kap tih an sawi.
Hetianga inkahna hi tum eng emaw zat a thleng tawh a, April thla atanga inkahhai an kalpui mek chu a derthawng hle tih a lang.
Hetianga ram pahnihte inkara buaina a awm chhunzawm zel lai hian US chuan Iran World Cup football team tan visa a pe a, June 15-a Los Angeles-a an inkhelh hmasak ber tur an khelh hmain US chuan visa a pe ta a ni.
Tun hi intihsiak thlengtu ramin an indopui ram team an mikhual hmasak ber a ni.
Inbeihna thar thleng hi US leh Iran inkara inkahhai thuthlung chu a la ding reng a, indona titawp tura inremna siam tuma indawrna erawhin hma a sawn zo lo va, US chanchinbute chuan President Donald Trump-a’n inremna thuthlung tihdanglam a dil niin an tar lang bawk.
Kar hmasa Thawhtanni khan Iranian foreign ministry thupuangtu chuan US hian ‘a ngaihdan a thlak danglam reng a, thil thar emaw, inhnialna emaw a siam chhuak reng a ni’ tih a lo sawi tawh.
US leh Israel hian February 28 khan Iran chu nasa takin an bei a, Middle East ram pumah buaina a chhuah zui phah.
Iran hian phuba lak nan Gulf-a Israel leh US tanpui ramte beiin khawvela tuialhthei leh liquefied natural gas phurh 20% vel kalna, Strait of Hormuz chu a khar zui bawk.
Heng tuialhtheite hi Iran atang chauh ni lovin Gulf ram dang – Iraq, Kuwait, Qatar, Saudi Arabia leh UAE atanga phurh chhuah thin an ni a. Strait khar a nih avang hian khawvel pumah tuialhthei man a sang hle tawh.
April thla tir lama inkahhai an remtih hnu lawkah US chuan Iran lawng chawlhhmunte a khar zui a, hei hi Trump-a chuan ‘inremna siam, tihchian leh ziah a nih hma chuan kalpui chhunzawm zel a ni ang’ tih a sawi zui bawk.