Inkahhai tluantling atan Israel-in inbiak a inpeih

Inkahhai tluantling atan Israel-in inbiak a inpeih
Israeli Prime Minister Benjamin Netanyahu-a chuan Ningani khan a sorkar chu Hamas nena inkahhai tluantling a awm theih nan inbiak a inpeih reng tih a sawi a, hetih lai hian inkahhai lailawk kalpui tura indawr mek a ni bawk.
Inkahhai tluantling puang tur erawh chuan Hamas hian an ralthuam an daha Gaza an thununna an kalsan a ngai tih a sawi a, Israel duh dan anga inremna hi a awm thei lo a nih erawh chuan indona chu a kal zel dawn tih a sawi.
Netanyahu-a’n hetiang a sawi mek lai hian Gaza-a civil defence agency chuan Ningani khan Israeli-ten damdawi in tuala ei tur dawng tura intlar an kahnaah naupang pariat telin mi 66 an thi tih a sawi.
UN hnuaia naupang buaipuitu pawl bik chuan naupang thi zinga pakhat hi mipa naupang kum khat mi lek niin a thih hma lawk hian thil a sawi hmasak ber a sawi chhuak ve chauh nghe nghe niin a nuin a sawi tih an tar lang.
Netanyahu-a hi US-ah zinin President Donald Trump-a nen thla 21 indona kalpui meka ni 60 chhung inkahhai a awm theih dan tur Washington-ah an sawi dun.
Qatar-ah Israel leh Hamas aiawh hi mi dang kaltlangin an inbe mek bawk a, hel pawl lam hian indona chhuah chhan ber, October 7, 2023-a Israel an beih tuma hren tura an hruai la dam mi 20 zinga 10 chu chhuah an remti tawh.
An mutan lian tak zingah Hamas hian Gaza-a puihna lut zat tur bituk awm lova luhtir leh Israeli sipai la awmte chhuah vek an duh a. Hei bakah hian an pawl hian inremna tluantling a awm theih nana ‘thu dah neih’ an duh bawk.
Netanyahu-a hi an ramah pawh indonaa sipai thi an tam tawh avangin inkahhai puang tura nawrtu a nei na ve hle tawh a, heti chung hian Hamas-ten ralthuam an tun leh tihchimih vek chu Israel ‘tum lian ber’ a la nih reng thu a sawi.
“Hei hi inbiakna hmanga tih theih a nih chuan a ropui ngawt ang. Ni 60 chhunga indawra tihfel theih a nih loh erawh chuan kawng dangin kan tum hlen turin kan che ang a, kan sipai huaisente pawh kan hmang mai ang,” tiin a sawi niin AFP chuan a tar lang.
Hetih lai hian Hamas hotu lian, Bassem Naim-a chuan Israel-in ‘kan ram an luah’ emaw, Gaza hmun kilkhawra Palestinian-te an dah khawm chu an pawm thei dawn lo tih AFP a hrilh.
Hamas chuan Israeli-ten Egyptian ramria Rafah an luah leh Rafah leh Khan Yunis inkalpawhna, Morag Corridor an thunun chu an pawm thei lo tih a sawi.
Kumin kum tir lamah khan Israel hian Gaza ram zau tak an lak thu sawiin mi chengte tan buffer zone an siam.
Naim-a hian US leh Israel puihnaa puihna thil sem dan chu tha a ti lo bawk a, ei tur dawng turin thihna tam tak a thlen phah niin a sawi.