Inkhelh bansan Marcelo

Kum 40 tlin dawna a team-mate hlui Sergio Ramos-ate’n Mexico an la pan deuh deuh laiin Real Madrid great dang Marcelo chuan kum 36 mi niin a boot a khai hul ve ta.
Kum 2007-2022 chhunga Spanish giants tana khel Marcelo hian Spanish club tan khan trophy 25 tehreng lakpui hmanin, game 546 khelhah LaLiga title paruk a lakpui tling.
Brazil defender hlui Marcelo hian tunkar Ningani khan football khelh a chawlhsan thu hi puangin, a career-a Champions League trophy panga zet la tling hi professional huangah kan hmu dawn ta lo a ni.
He defender hian 2014 Champions League final-ah goal khungin, ani bakah hian Gareth Bale, Cristiano Ronaldo leh Sergio Ramos-te paw’n an khung bawk a; kha hnehna avang khan Real Madrid chuan hun rei tak an lo nghah tawh tihlawhtlingin ‘La Decima’ an lawm thei ta a, Europe title 10 an lak tlinna chiah niin, kum 2015-16 leh 2017-18 season chhunga a zawn zata vawithum ngawt Champions League title hawn thei squad zingah a tel zui leh bawk.
Real thuam inbel chunga Marcelo trophy hawn dangte chu Copa del Rey trophy pahnih, Spanish Super Cup panga, Club World Cup pali leh European Super Cup pathumte niin, Madrid-a a hun tawp lamah captain bahren a hlawhchhuak bawk.
Chuti ang mi chuan, “He hmunah hian player ka nihna zawna ka zinkawng chu a lo tawp ve ta a, mahe, football tan hian pekchhuah tur tam tak ka la nei,” tiin social media platform Instagram-ah a chawlh thu a tarchhuak a, lawmthu sawi nghalin, a post en hian football chu kawng dang atanga la chhunzawm tho a tum niin a lang!
Real Madrid president Florentino Perez pawhin an defender hlui chawlh thu a hriat hnu lawkah thuchhuah siam ve nghalin, “Real Madrid leh world football history-a left back ropui berte zinga pakhat niin, hun rei tak a chetla kan thlir thei kha kan nihlawh a ni.
“Kan legend ropui berte zinga mi niin, a tan Real Madrid hi home a ni reng ang,” tiin a thlah.
Marcelo hian a hun tawp chu youth leh leh professional huanga a career a tanna Brazilian Serie A club Fluminense-ah hmangin, he team tana a khelh tawpna chu kum 2023-a Copa Libertadores title an lak kha niin, kha mi kum vek November thlaah inhriatthiamtawnnain a chhuak zui ta a ni.
Brazil tan pawh game 58 khel tlingin, kum 2013 khan Confederations Cup a lakpui a, 2012 Summer Olympics-ah silver medal leh 2008 Games-ah ram tan bronze a awrh bawk.