A thlengtu team sawp thei Mizoram!

A thlengtu team sawp thei Mizoram!
38th National Games Women’s Hockey khelh mekah nimin khan Mizoram chuan an match hnihna khelin, Vandana Katariya Hockey Stadium, Haridwar-ah sili faiin Games thlengtu Uttarakhand an sawp a, naktuk chawhma dar 10:30 hian an match thumnaah Maharashtra an tum leh ang.
An pool match hmasaberah Mizo team hian khel tha tak chungin Meiteiho an inhnehtawkpui tawh a, a vawihnihnaah erawh an chesual duh ta lo a, a thlengtu team lakah zahngaihna an lantir lo!
Mizoram tana goal thuntute a hmasaber thawhtu Marina Laramnghaki leh a hnuhnungber khungtu Lalthantluangi inkara goal hnih hlawhchhuak thei Lalneihpuiite an ni.
Mizoram hian second quarter-ah penalty corner atangin an goal hmasaber an khung a; Lalhlunmawii’n cross bar a hlap per hnuah D line pawna chhuak tawh chu Marina Lalramnghaki’n khalhlutin mawi takin a hlap goal a ni.
Uttarakhand lamin an si phurh sut an tum a, Mizoramin khung belh ngei an tum bawk avangin an innawrtawn nasa hle a; chutih karah Mizote bawkin third quarter-ah goal an khung belh leh ta zawk a ni.
He goal hi counter-attack hmanga an sualchhuah niin, rang zeta Marina ball pek chu Lalneihpuii’n goal-ah a chantir chat.
Sihnih faia hma an hruai hnuah pawh Mizo nulate’n an nawr zui a, minute hnih pawh a la ral hmain long corner atanga inpekualin Lalneihpuii bawkin a lo dawng a, nalh taka defence a bum hnuah a hlaplut zui leh ta a ni.
Goal hnuhnung ber hi 4th quarter penalty corner atangin a ni ve thung a; chiang takin Lalthantluangi’n a thai lut a, goal dang luh belh loin Mizoram hi sili faiin an chak ta a ni.
Mizoram coach hi Lalrothuami (Btei) niin, manager Rosalind L. Ralte a ni thung.
Tarlan tawh thin angin, Mizoram hi
Pool B-ah Jarkhand, Maharastra, Manipur leh Uttarakhand-te nen an awmho a; table chung berah Jarkhand awmin, Mizoramin pahnih dinhmun an luah mek a, naktuk. Pathianni chawhma dar 10:30 hian an pool match pathumna turah Maharashtra an hmachhawn zui leh ang.