Inlaichinna tihnghet nana chindan \ha

Inlaichinna tihnghet nana chindan tha
Kawppui te nena kan inlaichinna hi induh tawnna ringawt hian a kalh kal reng thei bik lo. Kan inlaichinna tihnghet nan leh siamthat nana pawimawh thil chinthan (habit) a kan neih atana tha a awm niin relationship lama mithiam ten an sawi.
Kan thil chinthan (habit) hi kan inlaichinnaah pawimawhna a nei tih hi kan hrethiam kher lo mai thei a, mahse, relationship counsellor te chuan kan habit-te chu a pawimawh niin an sawi tlat. Chinthan tha kan neih chuan chu chuan inlaichinnaah mi tha zawkah min siam thei a, kan inlaichinna boruak pawh a vawng nungin a chhem alh thei dawn a ni.
1. Eirawngbawl dun fo hi kawppui te nena kan inlaichinna tinghettu tha tak a ni. Kan hriat hauh loh leh kan rinphak loh tawpin kan kawppuite nena eirawng kan bawl dun hian kan inlaichinna atana thil tha kan ti a lo ni reng. Eng nge chawhmeh kan siam ang a, engtin nge kan siam ang tih han sawi dun vel te kha kan hriat loh laiin kan nupa nun min phuar nghettu a lo ni reng thei. Eirawng bawl dun a that ang bawkin bazar dun pawh a tha, bazar-ah kan kal a, kan chawhmeh duh zawng te kan thlang dun a, kan bazar lai atangin kan chawhmeh tur kan plan lawk tawh tihna a ni.
2. Kawppui te nena thil ruahman dun fo chin hi tihthan a neih a hlawk khawp ang. Kan hmalam hun atana ruahmanna kan neih te sawi dun ila, weekend hman dan tur te, zin dun dan tur te, in ‘extend’ dan tur te, in chhung pindan rem that dan tur te…thil chi hrang hrangah ruahmanna te siam dun thin i la, mahni rilru-a a tlak nat dan dana thil ti ngawt lovin, idea te thawh dun ila, inrawn tawnin sawi dun ila, chu chuan kan hriat loh laiin kan nupa nun a lo phuar nghet dawn a lo ni.
3. Thil hriatloh chu inzawh hreh loh tur a ni a, chutiang bawkin thil hriat loh chu tha taka inhrilh hriat thin tur a ni. Hriat loh leh thiam loh te kan nei thin a, chutiang hunah chuan hre loh nih hreh vanga thil kan tihsual te a awm thin a, chu ai chuan kan hriat loh chu kan kawppui te tha taka zawh mai tur a ni. Chutiang bawkin kan kawppui ten an thiam loh leh hriat loh te pawh zirtir peih thin tur a ni. Lirthei khalh thlengin pasal ten an nupui te an zirtir tha peih lo fo thin. Hetianga kan kawppui te nena thil kan zir ho hian kan hriat loh karah inpawhna tha tak min lo siam sak thei reng thin a lo ni.
4. Kawppui te chunga ngilneihna leh dawhtheihna lantir hi tihthana neih tur a ni. Chutiang chu kan kawppui te chunga kan tihlan a tul hun a tam khawp ang. Kan ngilneih tawk loh leh kan dawhtheih tawk loh thin avangin kan rilru kan inhliam sak fo. Kan ngaihdan a thuhmun reng thei lo va, chutiangin kan duhdan leh rilru sukthlek te pawh a inang reng thei lo, chutiang hunah tak chuan kawppui te chunga dawhtheihna leh ngilneihna kan lantir hian kan pahnih inkar boruak tingheta siamthatu pawimawh tak a lo ni.
5. In chhung chet vel tihdun fo tur a ni. Mipain inchhung chet chu hmeichhe kutah dah bik mai loh tur. In tihfai dun te, thawmhnaw bal suk dun te, bedroom han singsak leh sitting room han remfel dun vel te hian kan hriat loh laiin kan nupa inkar boruak a lo siamtha dawn a ni. Inah chaw kan ei khawm emaw, kan thiante an rawn leng khawm emaw, a ni thei a, an haw hnuah hmun hnawk te chu a tifaitu zawk awm bik lova tihfel dun te hi chinthana neih tur a ni.