INLD chief kahhlum post-mortem hnial
Indian National Lok Dal’s (INLD) chief Nafe Singh Rathee, Haryana a Jhajjar a kahhlum ruang chu police ten a kaphlum tute an man hma chuan a chhung ten post-mortem an phal lo.
Nafe Singh Rathee fapa Jitendra Rathee chuan, “Police ten ka pa thattu an man hma loh chuan a ruang post-mortem kan phal dawn lo. Ka pa thihnaah hian local BJP leaders ten inhnamhnawihna an neih ka ringhlel a ni” tiin a sawi.
Ngenna an siam chungin police te chuan an chhungkua security an pek theihloh thu a sawi bawk a. “Police lam an ngawi tlat a. Kan family leh ka pa in security an nei lo. Ka pa khan kum nga chhung security a ngen tawh a. Ka pa kha national leader a ni a. Thah a nih hma khan political party tin ten lo thlawp se a ni tur” tiin Jitendra Rathee chuan a sawi.
Kapoor Rathee, Nafee Singh vah pawhin, “Misual te man an nih hma chuan post-mortem kan remti dawn lo. Misual te hming kan hria a ni” tiin a sawi bawk.
Hetihlai hian Haryana police te chuan he tualthahna kaihhnawihah inhnamhnawih nia ngaih mi pali an man tawh a. “Complaint kan dawn angin FIR kan registered tawh a. Team nga lai DSP pahni telna kan din tawh a ni. Investigation neih mek a ni a, physical leh scientific evidence kan lakhawm mek” tiin Jhajjar DSP Shamsher Singh chuan a sawi a. “CCTV camera tin te atangin finfiahna kan la mek a, vehicle kan rinhlelh te pawh kan enfiah bawk” tiin a sawi.
INLD chief Nafe Singh Rathee chu February 25 khan tutih hriatloh ten Jhajjar a Bahadurgarh railway crossing ah an kap hlum a. Report dan chuan misual te chu car a kalin car chhunga Nafe Singh leh party worker awm chu an pawng kahchiam mai niin an sawi.
INLD (Indian National Lok Dal) lader Abhay Chautala chuan Manohar Lal Khattar kaihhruai BJP sorkar chu tualthahnaa mawhphurtu tiin tualthahna chu Central Bureau of Investigation (CBI) te chhui a phut nghal a. Chautala chuan sorkar chetlak danah rinhlelh a neih thu sawi bawkin, “Sorkar hian a mawhphurhna te kalsanin Lawrance gang a sawi lang a. Chupawh lo ni se, hlauhawm a awm thei tih hrereng chung siin eng vangin nge security an pek loh” tiin a sawi bawk.