Inneih, inthen leh rokhawmna dan pass tak ennawn lehnghal

Mizo Inneih, Inthen leh Rokhawmna Dan ennawnin sawrkar din Review Committee chu an chairman, Law & Judicial addl. secretary Zahmingthanga Ralte hoin Nilaini khan an thukhawm.
Kumin State Assembly Session hnuhnung berin a pass, Mizo Inneih leh Rokhawmna Dan siamthatna – the Mizo Marriage and Inheritance of Property (Amendment) Act chuan Mizoram mipui zingah ngaihdan hrang hrang, a thlawp zawng leh sawiselna lamin a piang a. Mizoram sawrkar chuan heng ngaihdan leh sawiselna hi a dik leh dik lo zirchiang a, engtia kalpui tur nge tih uluk taka zir tura a tih angin Review Committee thutkhawm hi koh a ni.
Thutkhawma ngaihtuah zingah hian MHIP Gen. Hqrs-in Assembly speaker hnena an lungawilohna leh entha tura an ngenna lehkha, ZPM Val Upa Council-in chief minister hnena enthat an ngenna leh rawtna an thlen pawh a tel.
Chairman chuan, sawiselna leh ngaihdan hrang hrang chu uluk takin zir a ni a, a then chu thil niawm tak nia a lan laiin, sawiselna tam tak erawh thil hriatchian tawk loh vang a ni tih a sawi. The Mizo Marriage and Inheritance of Property (Amendment) Act 2026 chu Mizoram gazette-ah March 6 khan chhuah niin, hemi ni atang hian hman nghal a ni.
Kohhran hrang hranga inneihna kawltu zawng zawngin an hriat tur chu, he dan hnuaiah hian nupui pasal then tawhin midang an neih leh dawn chuan, court atangin Divorce Certificate an neih ngei a ngai a, chutiang nei loa nupui pasal dang nei chu BNS Section 82 angin kum 7 thleng lung in tan leh sumfai chawia hrem theih an ni dawn,” Law & Judicial addl. secretary hian a ti a. Fimkhur taka inneihna kalpui turin a chah.
Thutkhawmah hian Mizoram Kohhran Hruaitute Committee, Council of Churches in Mizoram, Mizo Language Development Board, MHIP Gen Hqrs, MUP Gen Hqrs, State Women Commission, Mizoram Bar Association bakah mithiam leh tuimi an tel a ni.