Inngaihzawnna tawngkam

Cushioning: Tu emaw i ‘cushion’ a nih chuan in inngaizawng tho a, mahse, in ‘ni’ reng dawn lo tih i hre lawk. Tichuan, then duh mai si loin, inthen hun atan tiin midang i lo sìr-dêt phah reng a, inthen thut pawha i khawhar lohna tur i lo nei fel diam. Chutiang chu cushioning an tih chu a ni.
Deeplinking: Hei chu tu emaw i duh ruk deuh i nei a, tichuan a social media lamah i tuan ta a, a Facebook emaw Instagram emaw thlalak hlui deuh tawh te enkualin i like kual vel chiam chiam a, chu chu deeplinking an tih chu a ni. A social media post hlui i like sak vel kha a lakah i rilru a no riau tih i lantirna a ni.
Ghosting: Hei chu a tawng tawh kan awm nual ang. I ngaihzawng khan engmah sawi lovin a reh san thut che a, i nun atangin a inthiarfihlim hmak. In inkar a tha reng emaw i ti a, mahse, a reh thut mai a ni. Facebook leh WhatsApp lamah a block vek che a, i phone call thlengin a block vek. Hetiang hi i tawng a nih chuan an ‘ghost’ che tihna a ni.
Caspering: Ghosting dan ziaawm deuh zawk a ni deuh mai. Ghosting hi chu a na duh ngar ngar viau a ni. Caspering hi chu tu emaw i ghost hmain, a hriatthiam theih tura engtin emaw i tihlan kha a ni. I rehsan dawn tih a lo hriatthiam theih tura signal i pek kha a ni.
Breadcumbing: Serious pui duh tak tak si lo, then duh chuang si lo, a lung tileng tawh vel a chhaih kha breadcumbing chu a ni. A text che a, a fiam che a, amah i duh theihna tur tawk velin a ngaihsak che a, mahse, chubak a awm lo, thlah duh chiah si lo chein, serious pui duh chuang bawk si lo chein a awm vel a ni ber mai.
Orbiting: Orbiter ho hi chu an ngeiawm ve angreng, a changin an reh daih a, an rawn lang leh thut thin. Kar hnih khat te a reh vang vang a, chumi hnuah i Instagram thlalak te a rawn like thar leh a, a rawn be leh thut thin che. A khawhar hnemtuah a hmang che a ni duh khawp ang.