Inremna angin Assam-Meghalaya ramri hmun rukah boundary pillar phun
Inremna angin Assam-Meghalaya ramri hmun rukah boundary pillar phun
Kum 1972-a Assam atanga Meghalaya a indan hnu atanga buai tawh an ramri chu ching fel zelin Thawhlehni atang khan Assam-a Kamrup district huam chhung, Hahim-ah chuan inrina chhinchhiahna, boundary pillar an phun tan.
Pillar-te hi Gijang leh Tirchang lui kamah, khaw hrang hrang – Meghalaya lama Athiabari leh Assam lama Umshek (Mathapota), Maspara, Malapara, Ranighar, Salpara, Hahim bazar bula Thutia Bazaar, Rangsapara khaw kaltlanga phun a ni dawn a. Hetianga ramri chhinchhiahna siam tur hian June 2 khan state pahnih chief minister, Himanta Biswa Sarma leh Conrad K. Sangma te chuan inremna an ziak a ni.
Ramri tifel tur hian state pahnih aiawhte hi vawi 32 an inbe tawh a, sq km 2,700 chuang huam chhunga hmun 12-a an inrem lohna chin fel tuma indawr an ni.
Kum tam tak an buai hnuah March, 2022 khan Assam leh Meghalaya hian Union Home Minister Amit Shah-a hriatpuinain New Delhi-ah Memorandum of Understanding (MoU) an ziak a, hmun 12 buai an neih zinga paruk chu chin fel hmasak turin an ti a ni.
Thla hmasaa an inbiak leh hnuah chief minister pahnihte hian an buaina hmun ruk – Tarabari, Gizang, Hahim, Boklapara, Khanapara-Pilangkata leh Ratacherra-ah August 15, 2025 hmain boundary pillar phun ni se tiin an inrem a ni.
“Kan phun hi concrete pillar a ni satliah lo va, inremna, muanna leh nakin zela ramria chengte inunauna tur entirna a ni a. Chief minister pahnihte an lo inrem tawh angin Independence Day hmain kan tifel vek dawn a ni,” tiin survey team-a an hotu chuan a sawi.
State pahnih atanga field unit-ten Gijang chhehvela inrina lai pawh an en ho zel dawn tih as awi.
“Kum tam tak chhung inhnial reng rengin kan khawsa a, hmun khat hi neitu pahnih kan awm a. Vawiin hian lunga history inziak chu a hriatpuituah kan tang ta a ni,” tiin Rangthali khuaa cheng pakhat chuan a sawi.
Hmun ruka buaina chin fel a nih lai hian hmun ruk dang — Block I, Block II, Langpih, Deshdoomreah, Khanduli leh Nongwah-Mawtamur te chu hmabak a la ni a. Heng hmunte hi hnam thil avanga thil chin fel harsa tak, tun hma atanga inpawh tak, inchuh lai ni si a ni hlawm. Assam Reorganisation Act, 1971 tlawhchhana ramri rin mai dawna a taka tih harsa tak lai vek a ni.