Inrenchem

Prime minister-in ram pum tana ngenna a siam angin Mizoram sawrkar pawhin a hnuaia thawkte chu sum leh oil inrenchemna atan kalphung hman tur a duang thar a. In atanga hna thawh, sawrkar lirthei tlan chhuah loh ni siam leh traffic jam avanga hun leh oil a hek lohna turin sawrkar department ho pawh pawl hniha thenin pisa kai hun a siamsak a. He ruahmanna hi nimin May 21 atang khan hman tan a ni a; kan sawtpui viau turah han beisei phawt ila.
Sawrkar laipuiin inrenchem a tul thu a puan chhan hi kan hre vek a, West-Asia buainain ram economy a nghawng vang a ni, chipchiara sawi ngai lovin kan hre tlang vek awm e.
Ram a buai emaw, buai lo emaw, mahnia thawhchhuah nei tam lo tak Mizoram tan hi chuan “Inrenchem” hi thupui bera kan neih a pawimawh lehzual awm e. Chutih laiin, kan khawsak dan phung han en hi chuan, a tlaran thei ang berin kan khawsa ta mai emaw tihturin kan awm leh tlat thin. Tui bill emaw electric bill emaw, sâng mah se, ka pe thei tho, tia sum leh paia buai lo kan nih avanga ren baksak lova, a chuang a liam kan hmanral hian, power leh tui lak nan sawrkarin sum tam tak tak a seng reng a, chu chu mipui chhiah tlingkhawm atanga pek vek a ni. Sawrkar sum kan tih thin hi a neitu chu tu dang ni lovin mipui, nangmah kha a ni.
Sawrkar thar apiang hian inrenchem hi an thupui deuh zel a, sawrkar tirh lamah chuan inrenchemna lam hawi programme hriat tur a awm ve zut a, a lo rei deuh a, ‘sawrkar hmasa pawhin an ti ve tho, bla bla…’ tih chhuanlam siam a ni duh hle bawk.
Inrenchem dan tur hre ber chu sawrkar hnathawkte hi an nih a rinawm; a chhan chu office expenditure kal dan engkim hre vektu an ni. “Hei hi chu heti zawk hian ti ila, sum tam tak kan save thei ang.. etc. etc.” ti thei deuh vek an nih a rinawm. Tunah pawh hian, ‘traffic jam avanga hun leh oil a hek lohna tur’ tia pisa kai hun her danglam aia ‘austerity measure’ lakna tur tha zawk hi a tamin a rinawm. Entir nan, sawrkar lirthei privatisation kalpui dan te pawh hi enfel ngai a awmin a rinawm. POL inpek dan leh department pawisaa hlawh pek driver chhawr tlat si an awm em tih te pawh enfiah a pawimawh maithei. Programme hmang tur minister lirthei inzui duah duah te senso hmang hian thingtlang hmasawnna tam tak a thawh theih a rinawm bawk.
Eng pawh ni se, ram a buai emaw, buai lo emaw, Mizoram hi chuan inrenchemna lai tur hi a zawnin i zawng zawk ang u.