Insawisel leh infak

Tun hnai khan ZPM party office-a inkhawmah minister Prof. Lalnilawma chuan, an sawrkar tirhah harsatna engemaw avanga kawng an siam nghal mai theih loh avangin sawisel an tawk tih sawiin, tunah chuan an tum angin hma an la chho a, power leh tui lama harsatna pawh Aizawl mai ni lovin district khawpui dangah sutkian zel a ni, a ti a. Sawrkar hmalakna tha hrang hranga lawm ve thei lo, sawiseltute chu a hmang tangkai ber ber an ni, a ti bawk.
Minister hian ‘lawm ve thei lo’ tia a puhte hi tu dang ni lovin opposition party te an nih a rinawm a. Party dangte hian kawng chhia emaw power chhia emaw, tui lama harsatna thleng emaw an lo sawisel thin a ni maithei e; a sawiseltute hi a lo dawngsawngtu hian ‘lawm ve thei lo’ tiin a puh ta mai a nih hmel.
Minister hian ‘lawm ve thei lo’ tiin lo sawi pawh ni se, a hmuh dan leh a ngaih dan a sawi chhuak ve a ni mai a; politician a ni a, a lo ‘politicised’ duh deuh a nih pawhin a mawh lo va; kan hrethiam tlang vek awm e. Mihring zingah hian ‘lawm ve thei lo’ an awm a nih chuan chu mihring chu a piangsual tihna a ni ang.
Eng pawh ni se, insawisel hi thil tha zawk duh vang a ni tih kan hriat nawn fo a pawimawh a, huat tur a ni lova, sawiseltute puh chhiat viau tur pawh a ni awm lo e. Opposition party emaw mipuite emaw hian kawng chhia kha sawisel miah lo ta se, mipui tawrhna nasa zawk a thleng ngeiin a rinawm. Nasa taka sawiselna kara kawngpui chhia siam that kha nge chak zawk ang a, sawiselna awm miah lo kara kawngpui chhia siam that kha? tih zawhna hi inzawt ila, sawiselna avanga kawngpui chhia siam that chu a rang zawkin a chak zawk ang tih mi pangngai chin chuan an hrethiam nghal vek ang.
Insawisel kan taimak viau rual hian, infak lamah erawh kan inkiltawih deuh thung niin a ngaih theih; hei hi thudik a ni. Opposition party-te pawh hian, hmasawnna duh avanga insawisel an taimak ang bawk hian, ruling lamin mipui hamthatna tur hmasawnna thil a thawhte hi fak ve thin tho se, chu chu ‘thil tha duh avanga insawisel’ ang bawka hlu a ni. Infak hian mi a tiphur a, thawhhona tha a siam a, chumi karah chuan ram leh hnamin hmasawnna tha tak a chang thei dawn tihna a ni.
Ruling lam pawh hian sawrkar hmasa thiltih dan sawisel chang an nei ve bawk awm e. Hetiang hunah hian, an sawisela te tih ang an tih ve loh tur thuin an chhilh fo bawk. Chutiang bawkin, ruling-in sawrkar hmasa hmasawnna project thawh zawh hman loh a chhunzawm tak te, sawrkar hmasa tih that han fak changte pawh an nei ve bawk.
Opposition-in ruling a fak emaw, ruling-in opposition a fak emaw hian, an faka te dinhmun aiin anmahni a faktute hian an dinhmun an chawisang sauh zawk tih an hriat ve a ngai. A tul hunah chuan insawisel ang u, a tul hunah infak hreh lo bawk ang u; chu chu mimal emaw party emaw hamthatna tur ni lovin ram leh hnam hamthatna tur zawk a ni.