Insual buai ching lakah a na thei ang berin hma lak tum

Insual buai ching lakah a na
thei ang berin hma lak tum
Khawlaia insual buai ching lakah a na thei ang berin hma lak zel an tum tih Mizoram Police chuan an sawi a. An hma huna ei an zawn zelna atan pawh pawi thei, police thubuai – criminal case nei lo tura insum a, inthiar fihlim dan zawng turin thalaite an chah.
Mizoram Police thuchhuak chuan, November 2 zing dar 2.00 vel khan Bawngkawn to Thuampui Road-ah khawlaia tlangval insual buai chungchangah Bawngkawn Police Station chuan hma a la a, he thila inhnamhnawih mi 10 man niin, heng mite lakah hian criminal case – Bawngkawn PS Case No. 398/26 Dt. 02.11.2026 u/s 194 (2)/ 292/125 BNS ziahluh a ni a, an vai hian man niin, court-ah thawn an ni tih a sawi.
Hetianga khawlaia insual buai ching lakah hian a na thei ang bera action lak zel tum tih an sawi a. Aizawl khawpui huamchhungah police patrolling neih thin niin, police patrolling party awm remchan lohna hmunah hetiang thil thleng a awm a nih chuan a ranglamin 112 ERSS emaw heng police station number – Aizawl PS – 8794747291, Bawngkawn PS – 8794747292, Vaivakawn PS – 8794747293/ 6909316441, Kulikawn PS – 8794747294, Zonuam OP – 8794747295, Sialsuk PS – 6909316443/ 9366884087, Sairang PS – 6909316442, Darlawn PS – 6909316446, Sakawrdai PS – 6909316445, Seling OP – 7005994956 ah information pe thin turin mipui an ngen tih an sawi a ni.
‘Kan thalaite hriat atana pawimawh chu, police-ah thubuai kan neih chuan, dam chhung criminal antecedent kan nei dawn. Hei hi kan hmalam hun zela harsatna tam tak thlen thei a ni a. Hetianga intihbuaina hi thleng tawh lo se kan duh a, a thleng a nih chuan na takin an chungah action lak a ni zel dawn,’ a ti.