Inter hmahruaina nghet zual deuh deuh

Bologna khelmuala 1-0 hnehna changin Inter Milan chuan Serie A table-a an hmahruaina an tichhah leh sauh a, khelh 28-a point 75 hum chungin anmahni hnaihbertu Juventus nena an inkar chu point 18 zetin a inthlau ta!
Palina luah chunga Champions League hmun beisei kawh ve mek Bologna hian champion tura ngaih team lakah point khat tal hlawhchhuah tumin tlarhnung ven lam ngaipawimawh teh mah se first half minute 37-ah Yann Bisseck an dang zo lo a, Inter tana Bisseck-a goal hmasaber hi hun puma sut zo loin an kawtkaiah Bologna-in point an thawkchhuak zo ngang lo.
German centre-back Yann Bisseck-a goal hi chawlhlawk hma minute riat la awma Alessandro Bastoni siamsak niin, inelna hrang hrangah belhkhawmin Internazionale hi game 12 chhung tehreng an chak zawn tling ta a ni.
Nizan result tarlan hman lohah Juventus-in Atalanta an mikhual a, an chak chuan hmahruaitu Inter nena an inkar hi point 15-ah bawk an dahkir leh thei ang.
Season kal lai home match bika an vawihnih tlawmna kan thlirliam hnuah Bologna khan Serie A table-ah palina an la luah zui ve zel a, top four-a an dinhmun erawh a him lo hle a, an hnuai chiaha pangana luahtu AS Roma aiin game khatin an khel tam a, nizan inkhel result tarlan hman loh pakhatah Roma-in mualneitu Fiorentina laka point thum an hmuh theih chuan Bologna nena an inthlauhna hi point khat chauh a ni zui leh ang.
Inrinni zan inkhelah an siphurh sut tumin Bologna khan second half hun tam zawkah inkhel thunun bawk mah se league game 28 khelh tawha goal 13 bak la chhuah duh lo Simone Inzaghi team tlarhnung khawng lutuk kha an sutlang zo ngang lo a ni.
Away hnehna an sualchhuah leh nen Inter kha league-ah match 10 an chak zawn tling ta chiah a, an club chanchina league game 10 chhung an chak tluan parh vawithumna chiah la niin, Serie A title 20 lak tlin tuma an beih mekna kawngah an tlo tluang zel.