January 18, Nilai zan khan Saudi Arabia a King Fahd Stadium ah Italian Supercoppa final khelh a ni a. Champion lai Inter Milan chuan an khingpui AC Milan chu si thum faia hnehin an champion nawn leh.
-- Advertisement --
Italian Serie A champion AC Milan lakah Coppa Italia champion Inter Milan in an khel tha viau a, chawlhlawk hmaa goal hnih an thun bakah chawlhlawk hnu lamah goal an thun belh leh bawk. Serie A champion AC Milan hian hun pumin goal thun tum mahse an hlawhtling zo lo.
King Fahd Stadium a inkhelah hian minute 10-na lekah Federico Dimarco chuan hmahruaina goal a thun a. Hmahruaina goal an thun atanga minute 11-naah Edin Dzeko chuan an goal hnihna a thun zui leh a, si hnih faia hmahruai chungin chawlhlawk an hmang.
Chawlhlawk hnu lamah Inter Milan an khel tha chhunzawm a, AC Milan in goal thun theihna hun tha an insiamchhuah hleithei lo. Milan in goal thun an mamawh em em laiin Inter bawk an che fuh nawn leh a, minute 77-naah Lautaro Martínez chuan goal thunin Inter Milan chakna a nemnghet. Inkhel hmuhnawm takah goal dang a luh belh tawh lova, Inter chuan Milan khawpuia an elpui lian AC Milan chu si thum faiin an sawp.
Italian Supercoppa hi Italian Serie A champion leh Coppa Italia champion lai team hnihte an intumna thin a ni a. Inter Milan hi kum 2022 leh 2023 a Supercoppa ah an chak zawn a. Kum 1997 hnu lama Italian Cup final-ah AC Milan an hneh hmasak ber tum a ni thung. Kum 1977 khan Coppa Italia final-ah an hneh lova, kum 2011 khan Italian Supper Cup final ah AC Milan hi an hneh lo tawh bawk