Inter Milan in final an lut

Thawhleh zan khan UEFA Champions League semi-final second leg khelh a ni a. Milan derby hmuhnawm takah Inter Milan chuan AC Milan an hneh nawn leh a, kum 13 hnuah a vawi khat nan champions League final an lut. Inter hian Manchester City leh Real Madrid te inkhela chak zawk zawk an hmachhawn zui leh ang.
Giuseppe Meazza-a inkhel hmuhnawm takah hian semi-final thawh khatnaah si h nih faia lo tlawm tawh AC Milan in goal thun ngei tumin tan an khawh a. An khuaa an elpui lian Inter lehthal an tum hle. Inkhel tan phat atangin an khingpuite an nawr nghal a, minute 10 an khelh tlin meuh chuan hlauhawm vawi thum ngawt an siam hman. Brahim Diaz pet hlauhawm tak chu si nghak Andre Onana chuan tha zetin a lo dang a, an team a chhan him. First leg-ah hliam vanga inlan thei lo Rafael Leao inlanin Milan a fuih phur viau a, forward tha tak Leao hian goal thun theihna hun tha a neih a chhawr tangkai thei bik lo thung.
Bet zawkah an tan reng hnuin Inter Milan hian an mikhualte an nawr let a, chawlhlawk hmain goal an thun teuh hle. Free-kick atanga ball kal, Edin Dzeko tauh hlauhawm tak chu Milan si nghak Mike Maignan chuan vanneihthlak ang reng takin a dang a, an team a chhanhim ve bawk a. Inkhel hmuhnawm tak hi goal awm lovin first half a tawp.
Chawlhlawk hnu lamah pawh AC Milan an khel tha chhunzawm a, hlauhawm siam hmasa zawkah an tang leh. An khingpuite nawrin, hlauhawm nei thin mah se goal an thun theih loh an tuar a, goal chhuah hmasa zawkah an tang ta nge nge a, dinhmun chhe zawkah an din phah.
Si hnih faia hmahruai tawh Inter Milan hian fuh takin an khingpuite an nawr tlang a. Box chhungah fuh leh nalh taka ball an inpek tawn hnuin Captain Lautaro Martinez chuan near post-ah fuh zetin a pet goal a, minute 74-naah hmahruaina goal a thun. Si hnih faia hmahruai tawh zawkin hun tawp dawn hnaihah goal an thun leh vangin final lut tur zawk a chiang tawk viau tawh a, Inter Milan chu final lut ngei tura ngaih ngheh an ni tawh. Inter hian an mikhualte nawr zui viau mah se goal dang an thun belh thei tawh lo va, si khat faiin an chak ta a ni.
Second leg-ah an chak leh tak vangin Inter Milan hian AC Milan hi si belhkhawmah 3-0 in an hneh a, kum 13 hnuah a vawi khat nan champions league final an lut. UCL-ah vawi thum champion tawh Inter Milan hian final-ah khingpui hautak tak an hmachhawn a ngai dawn a. Manchetser City leh Real Madrid te inkhela chak zawk zawk nen June ni 10 khian Istanbul khawpuiah European champion nih tumin final an khel ang.