Daily Newspaper

Inter Milan in final an lut

10

Thawhtan zan khan Europa League semi final khelh zawh a ni ta a, singa fai ngawta Shakhtar Donetsk sawptu Inter Milan chuan final an lut a, Sevilla an hmachhawn zui leh ang.

Final luh inchuha inkhelhah hian innawr tawk thawkhat viau mahse Donest lam hian hun tha an insiamchhuah hleithei lova, goal thun theihna hun tha tia sawi tur vawikhat chiah an nei. Inter Milan lam hian an hun tha neih an chhawr tangkai ve thung a, goal nga thun theihna turah goal nga an thun a ni ber mai. Conte hnuaiah Inter Milan in hma an sawn zel a, trophy lian season season khar turin vawikhat chak chiah an mamawh tawh.

Cologne khawpuia semi final hnuhnung zawkah hian minute 18 chhung chu an innawr tawk hle, minute 19-naah Lautaro Martinez chuan danglamna a thlen ta thung. Barcelona leh club lian dangte nena sawizawm hlawh tak Martinez hian Nicolo Barella cross tha tak chu tawih zetin a tauh goal a, hmahruaina goal a thun. Argentine forward Martinez hian season kal meka inelna hrang hrangah goal 21 a thun tling a, a chetha hle. Inter Milan player zinga chetha ber dawttu a niin Lukaku hnung chiahah a awm. Minute 74-naah mawi taka pet goal in an goal thumna a thun a, hei hi goal 21 a putlinna a ni,

Minute 19-naa Martinez goal thun hnu hian goal dang a luh belh lawk thei lova, team hnihte muallaiah an indawng chat tawn a ni ber mai. Hun rei tak goal lut a awm loh hnuin Serie A club lian hian minute 64 hnu lamah goal li an thun belh ta thung. Minute 64-naah Danilo D’Ambrosio chuan corner atang ball kal chu a tauh goal a, an goal hnihna a thun. Minute 74-ah Lautaro Martinez a inlar a, hemi hnu lam hi chu Romelu Lukaku chan a ni ve thung.

Manchester United atanga Inter Milan zawmtu Lukaku hian minute 78-naah Martinez siamsak atangin an goal lina a thun a. Minute 83-naah chak taka ball umlut in a pet goal zui leh a, an goal ngana a thun. Lukaku hi a chetha tluang hle a, season kal mekah Inter Milan tan goal 33 a thun tling der tawh. Europa League bikah hian khelh 10 chhung zet goal a thun zawn tawh a, hei hi Europa League-a record thar a ni hial. Inter Milan tan season khat hmannaa goal thun hnem ber chu striker ropui Ronaldo kha a ni a, kum 1997-98 season khan goal 34 a thun. Lukaku hian final-ah goal a thun a nih chuan Ronaldo record a nih rual ang a, goal hnih a thun thei a nih chuan reconrd thar a siam thung ang. Lukaku hian season kal mekah Inter Milan tan vawi 50 a khel tling hial a, season khatah Inter Milan tana khelh tam pathumna niin a chungah hian Samuel Eto’o (53) leh Javier Zanetti (52) te an awm.

Lukaku goal hnih thun hnu hian goal dang luh belh tawh lovin inkhel a tawp a, Inter Milan chuan 5-0 ngawt a hnehna changin final an lut. Shaktar Donest hian goal thun theihna hun tha vawikhat chiah an nei a, Junior Moraes-a’n tauh luh theihna hun tha neih chu Inter Milan si nghak leh defender ten an tihthlawnsak. UEFA Cup/ Europa League semi-final vawikhat khelhah chak chiang ber an ni a, hnuhma tha dang an hnutchhiah belh. Inter Milan hi European competition final an luh tawh vawi 11-ah an la chak vek a, hei vang hian champion turin an inringtawk veng vawng hle. Zirtawp zan khian final hi khelh a ni ang.

Final-a Inter Milan hamchhawn tur Sevilla hi Manchester United hnehtute kha an ni a, Europa League-ah vawi nga champion tawhin, champion ngun ber an ni a, Unai Emery hnuaiah vawithum an champion zawn a, vawithum champion zawn thei awmchhun an ni bawk. Europa League-a hnuhma nei tha ber an nih vangin Inter hmabak a hautak dawn a, final hmuhnawm tak a nih ngei a rinawm. Kum 2011 hnu lamah Trophy lian an la chawi leh miah lova, Sevilla hneha an champion hlauh a nih chuan Chelsea manager hlui Antonio Conte hming a tha leh zual hle ngei dawn a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy