Pneumonia enkawl nan apple

Pneumonia enkawl nan apple
Nitin apple pumkhat tal ei ziah la, dammawh hritlan i nei mang lo an tia lawm. Chu mai a ni lo, mithiam ten zirchianna an neih tharah chuan apple hi pneumonia laka min veng theitu tangkai tak niin an sawi. Apple-ah hian vitamin C a tam a, chu chu kan taksain natna a do theihna tichaktu niin, bacterial infection laka min vengtu tha tak a ni.
Mithiam te chuan pneumonia thlentu bacteria hian kan taksain natna a dotheihna (immune system) tihchak loh nan hydrogen peroxide a hmang tih an hmuchhuak. Hydrogen peroxide chu bleaching agent niin thil tihfai nan kan hmang nasa a, ha tihvar nan te, lu suk nan te pawh kan hmang a, pem a hnawh atan te pawh kan hmang.
Zirchianna neitute zinga an hotu Umea University, Sweden ami Nelson Gekara chuan, “Kan immune system beih let nana hydrogen peroxide hman chuan meialh leh meialh insualtir ang a ni mai. Taksa pawhin bacteria laka min veng turin hydrogen peroxide a tichhuak ve si a. Chuvangin, bacteria chi hrang hrangin kan taksa invenna hneh tumin chutiang chu an rawn hmang thin a ni,” a ti.
Gekara chuan, “Hydrogen peroxide neutralise nana tha bera kan hriat, kan anti-bacterial immunity tichak thei bawk si chu theiraha kan hmuh ang Vitamin C te hi a ni. Chuvangin, ‘an apple a day keeps the doctor away’ an lo tih te pawh hi tih mai mai a lo ni lo e,” a ti bawk.
Zirchianna neitute hian chaihchim-ah enchhinna neiin, hydrogen peroxide-in kan immune system a tichak theih dan leh bacterial infection, heng pneumonia ang chi te a do theih dan an enchhin a. Chuta an hmuh dan chuan, bacteria ten kan immune system a a pawimawh lai- inflammasomes an bei chat mai a, chu chuan immune system a tichak lo thin. Heng inflammasomes-te himicrobes siamtu bacteria lo tifai tura duan an ni. Pneumonia thlentu bacteria chuan hydrogen peroxide tam tak tichhuakin, chu chuan inflammasomes te chu che thei lo a siamin, immune system a tichak lo thin niin an sawi. Tichuan, bacteria ten inflammasomes te che thei loa an siam theih loh nan apple leh thei danga awm Vitamin C chu a tangkai ta em em mai a ni.