International Exposure Tour-ah Mizo tleirawl 3

International Exposure Tour-ah Mizo tleirawl 3
India rama National Centre of Exellence (NCOE) hrang hrang atanga Women Sub Junior Hockey player tha zual 16, stand by paruk, coach pahnih leh support staff pakhatte chuan International Training and Exposure Tour nei turin nimin khan Bangalore atangin Netherlands an pan ta a, an zingah hian Mizo tleirawl pathum an tel.
A hma lama tarlan tawh angin, he International Training and Exposure Tour-a tel tur hian Mizo tleirawl pathum – Lalnunfeli (Kawnpui), Laltlanchhungi (Durtlang Leitan Ramthar) leh Lakpeksangi (Rotlang West)-te thlan tel an ni.
He training exposure tour hian October ni 14, 2025 thlenga awh dawn a, hemi chhung hian Netherlands tleirawlte nen match an khelho thin dawn a ni.
He tour hi Sport Authority of India (SAI)-in India women hockey player naupang zawkte’n khawvela hockey coach tha ber berte hnen atang leh training facility tha ber hmanga skill, tactic leh playing style-ahte hmasawnna an neih theihna tur atana a buatsaih a ni.
Netherlands hi tunlai hunah chuan khawvela hockey thiam ber leh hockey in pui ang hiala ngaih a ni a; senior men, senior women leh junior women-ahte world ranking number one an ni vek!
Hockey club pawh 400 chuang lai awmin, club lian zualte phei chuan training ground/pitch pawh sawm chuang laite an nei hlawm!
Mizoram women’s hockey coach-te chuan hetiang hockey ram ropuia kan Mizo naupangte’n exposure tour an nei thei hi lawmawm an tih thu leh hmasawna nasa tak an neih phah ngei an rin thu an sawi.