Mi tumruh leh taima, High School Headmaster pension niin kohhran leh khawtlang aiawh pawl hrang hrangah hnarkaitu lo ni thinin Lunglei District Rifle Association dintute zinga mi, fate enkawl thlenga entawn tlak leh pa nih tling a ni.
‘Mahni seh lam seh tlat mai leh theih tawpa hma lam pan thin a nihna hian pa rintlak a ni tih a tilang chiang hle a ni…’ tiin ZPM tena Lalzuithanga chanchin an ziahah tarlan a ni a. Lunglei Municipal Council inthlanna neih zawh takah Word No III : Bazar Veng & College veng atanga thlan tlina LMC Chairman atana ruat zui chuan The Aizawl Post News Editor Lalremruata Renthlei hnenah tihian a sawi….
-- Advertisement --
Politics-ah sulhnu emaw i nei tawh em?
u Political lamah engmah inhmanna ka la nei lo. Kum 2021-ah pension-in kan chhuak a, tihian kan awm hle hle a, min lo sawm a, engmah sulhnu sawi tur ka nei lo.
Politics-ah lo tuina te emaw awn sa emaw i nei em?
uEngmah ka la nei lo reng reng. Mahse, ZPM te chu an policy te hi kan pension hnuah kan han phurpui tan dawn chauh emaw te a nia, a hma lamin engmah inhnamhnawihna ka nei ngai lo.
Chairman-ah an ruat ta che a, engtiangin nge LMC kalpui i tum ang?
uKohhranah te rawngte kan bawl thin a, ram tana thawh hi kan mitmei ve reng bawk a. Tunah ZPM-in mipui sorkar, langtlang sorkar an tih hi kan tui zawng a ni a, kan han bel ta pawh a nia, thlan tlin kan lo nih ve takah chuan langtlang tak, mipui sorkar, party sorkar ni lovin siam turin kan inbuatsaih chu a ni a, theihtawp kan chhuah ang chu party sorkar ni lovin mipui sorkar langtlang thei ang berin….
Inthlanah seat awm zawng zawng la vekin in chak em em a, in beisei sa a ni em?
uTun ang em ema kan chak chu kan ring em em bik lo na a, kan chak chu kan inring a, mahse, a tu hi nge chak lo ang a, tu hi nge tha ang tih chu keini chuan experience kan neih loh avangin assessment kan pe thiam lo va. Kan tlin chuan kan tling huk awm mang e ti te chuan kan han inngai ve deuh a, keini chuan kan hrethiam tlem khawp mai.
Eng nge inchakna chhan ber nia i hriat?
uKan chakna chhan ber chu – Tuna ruling party tena Lunglei lam pang min enkawl danah hian mipui kan lungawi lo tak tak tih hi pakhatna a ni a.
Tin sorkar kal tawh Congress leh MNF te hi mipui rilruah ser a awm deuh a ni awm mange kan ti a. Tin, a boruak hian a rawn keng a, neutral te hian min rawn bawh ve deuh a nih hi a, chhuanlam em em sawi tur dang a vang khawp mai.
Campaign strategy eng nge in neih?
uMi sawisel kan ti vak lo va, sum leh pai kan nei lo bawk a. Theihtawp kan chhuah a ni ve tawp mai.
Sum in seng hnem ber a?
uKha kha chu kan sen tak tak kha a nia, nuai khat seng thei kha kan nia, kan senna dik tak kan tarlang a. Hetah campaign kick off na te pawh kan telh a, chung te chu a ti tamtute pawh a ni ang chu, keini chuan seng tam pawh kan inti vak lo.
LMC a chakna chanin Mizoram pumah danglamna a thlen theiin i ring em?
uMizoram pum hian kan Lunglei LMC inthlan hi min ngaihven riau mai a. Chuvangin, chakna kan chan takah chuan ram pum hian an mithlir dan enin nghawng chu a neih ngei kan ring a, a beisei pawh kan inbeisei dan deuh chu a ni.
Mipui rilru tak tak hi hriatthiam a har a, hei kan han tling ta a, heti khawp hian kan chak ta a, mipui tawngkam leh titi leng velah hi chuan kan inpe deuh huk niin a lang a, kan performance-ah pawh a innghat bawk ang chu.
Nang pawh inthlan dawna ZPM-a lut chauh i nia, party-ah neuh neuh te a awm em?
uNeuh neuh a awm kan hre pha lo, a awm pawh kan hre lo. Lo awm pawh ni se keini hian kan hre pha lovang, kan la lut ve chauh a, nomination kan file a, a tukah kan campaign nghal tawp. Kan hotute pawh kan la hre kim lo.
Nangmah an thlang chat che a?
uKa hre lo le, min thlan chhan chu an hria ang a, sorkar hna rinawm takin kan thawk a, rui buk buk lo leh hmingchhiatna em em nei lo ta chu min thlang pawh a ni mahna le, eng nge a chhan tak chu ka hre lo va, min ring ngam chu a ni ve phawt a niang chu.
LMC hmangin Lunglei tihhmansawn in tum chiang?
uA tha thei ang bera kan kal tum a. Mahse, kan lut rawih a ni a, tihian kan tling a, kan inbuataih dawn a ni a, naupang hlim ang kan ni a, a dan leh hrai te, a inenkawl dan te engkim la zir chawp tur kan nihna deuh hi a awm a. Tun atan hi chuan theihtawp kan chhuah ang tih bak sawi theih a la vang viau.
ZPM Headquarter lam hotute ?
uKan hotute hian theihtawp min chhuahpui a, nomination kan file atangte, a tir phat atangin kan hruaitute hi an tha khawp a. Keini chu zirtir, titir kan nia, kan thiam lo khawp a, anni’n theihtawp min chhuahpui a, kan lawm em em a ni.
LMC-ah chairman i nia?
uUpa ber ka ni mai a, upa sakah tiin chairman-ah min ruat a ni phawt mai a, mahse, a thiam ber ka ni lo va, a hre ber ka ni lo va, keima mimalin chairman ka nihna angin mawhphurhna ka kovah a awm ang a, mahse, thunei ber nih ka tum lo va. Ka nau te hi mi fel tak tak, mithiam tak tak an ni a, an rintlakin ka hria a, kan sawiho ang a, a tha berin kan kal dawn a ni. n