Inthlan hmabak Punjab-ah AAP MLA pathumin BJP zawm

thlan a hnaih mek laiin Punjab-a Aam Aadmi Party (AAP) tan chanchin lawmawm loh tak thlengin an MLA pathum -Harmeet Singh Pathanmajra, Chetan Singh Jouramajra leh Kunwar Vijay Pratap Singh te chuan Thawhtanni khan BJP an zawm.
Hruaitu pathumte hian Delhi-a BJP Headquarters thlengin lawm luh an nih hmain ‘BJP Zindabad’ tiin an au rual.
Pathanmajra-a leh Jouramajra-a te hi Pathianni khan an party atangin an lo bâng tawh a. Singh-a hian Thawhtanni tuk khan bânna a thehlut veleh bawk.
AAP hian a thawh khat nan nakum inthlan atana an candidate tur mi 40 hming an puan hnuah an MLA-te hian an chhuahsan a. Pathanmajra-a leh Jouramajra-a te bial, Sanaur leh Samana biala ding tur erawh an la puang lo.
Sanaur MLA Pathanmajra-a hian a bânna hi AAP National Convener Arvind Kejriwal-a hnenah a thehlut a. Cabinet minister hlui, Samana MLA Jouramajra-a hian social media kaltlangin party a chhuahsan thu a puang thung.
BJP an zawm dawn thu hi Pathanmajra-a’n sawiin BJP President Nitin Nabin-a’n Delhi-ah Thawhtanniah a lawm luh tur thu a sawi a ni.
Pathanmajra-a hian BJP chu national party a nih angin Punjab-ah thuneihna an chan chuan an state tan a tha dawn tih a sawi a. Tun hnaia Union Home Minister Amit Shah-a’n ruihhlo tihbo tuma a intiamnate chu an mamawh tak a nih thu a sawi.
AAP chuan Thawhtanni khan assembly speaker hnenah party chhuahsantute chu an MLA nihna hlihsak turin an ngen nghal a. An pahnih hian party kalh zawnga an chet avanga an party-in an hrem (suspend) lai an ni.
Singh-a hian Assembly Speaker Kultar Singh Sandhwan-a hnenah MLA a nihna atanga bânna a thehlut ve thung a, Facebook-ah a tar lang bawk.
Singh-a pawh hi AAP-in June thlaa kum nga atana an suspend a ni a. IPS officer hlui a ni a, kum 2015-a police silai hmeh puaha Sikh pahnih thihna chhuitu, Special Investigation Team (SIT) pawh kha a ho a ni.
Kum 2022 assembly inthlan dawn khan Kejriwal-a’n AAP-ah a lawm luh kha a ni.