2023 MLA inthlapui hma in sawrkarin chhungkaw nuai khat hnenah SEDP tanpuina an sem hman an beisei tih chief minister Zoramthanga chuan a sawi.
-- Advertisement --
Thawhtannia Mizo Hnam Runa inkhawmah MNF president ni bawk Zoramthanga chuan MNF aia MLA nei tam an awm a rin loh thu sawiin, “Tunah hian hmun thuma thena hmun hnih MLA tha tak tak kan nei a, an ni lan thei tur an awm lo. Kan MLA-ten bial an enkawl ngat ngat a, development scheme lokal tur leh SEDP nen, party dangte aiin advantage kan nei tha zawk. Financial year tharah phei chuan SEDP thar nen, a dawng tawhte bakah inthlan dawnah meuh chuan chhungkaw nuai khatin an dawn hman ka beisei,” a ti.
Finance enkawl thiam loa puhna piahlamah sawrkar hlawh la tlai thin tihte chu finance changtu chief minister hian sawifiahin, central atanga fund lokal pangngai bak sum lokal pui ber chu share of taxes a nih thu leh hei hi thla laihawla lo thleng a nih tlangpui thu a sawi. “A chang chuan kan loan lakte hi thla tirah voice record hmangin min rawn thing thin. Heng karah hian hlawh pek chhuah a ni a, loan pawh rulh zel a ni,” a ti.
Phurritin a delh thin thu sawiin, “Sawrkar laipui nena inzawmna neite, Assam border te, Burma atanga kuhva, drugs, refugee leh smuggling nen, party chhung inrelbawlna bakah sawrkar sum indaih lohna avanga harsatna tinrengin a hlawma min tlakbuak chang chuan, ‘Lalpa rit ka ti hle mai’ tiin ka tawngtai fo thin,” Zoramthanga hian a ti.
ZPM chu beih ngai loin miin an hmu niin a sawi a. “Beih an ngai lo, anmahni leh anmahni an inbei nasa. MLA chuh tum an inthuah nasa dawn hle. Kum 2018-a an boruak ang kha a ni tawh lo. Unit system kan duh lo, kohhran hi kan unit an ti a. Chief ministerial candidate hial an neite kha ngaihzawng neih hma hawta fa hming sa lawk ang a ni. Inthlan zawhah erawh under 10-ah an awm chiang hle,” a ti. Tunah chuan ECI-a inziaklutin political party dik tak an ni tawh a, 2018 inthlan lai an ropui ang kha an ni tawh lo, tiin a sawi.