Inthlan kaihhnawiha sum hman theih dan inhrilhfiah

MLA inthlanpui atana Kolasib district assembly bial pathuma candidate-te, an election agent-te leh an expenditure agent-te tan Thawhlehni khan election expenditure kaihhnawiha an hriat tur inhrilh a ni.
Kolasib district election officer John LT Sanga bakah Kolasib district expenditure observer Karni Dan ten an telpui a. Asst RO Cheemala Siva Gopal Reddy leh election officer Christina Lalmuanzuali te an tel bawk.
District level master trainer Gilbert Lalhlimpuia, Kolasib bial assistant expenditure observer (AEO) Kevin Lalmalsawma, Tuirial bial AEO Lalramhluna Colney leh Serlui bial AEO PC Lalmuansanga ten election expenditure chungchanga hriat tur pawimawh an zirtir a. Inthlan campaign nana sum hman chungchang leh inthlan kaihhnawih thil hrang hrang chungchangah zawhnate an chhang a ni.
ECI chuan kumina Mizorama MLA inthlanpui neihah candidate tin chu inthlan campaign sensoah cheng nuai 28 thleng hman a phalsak a. Candidate tin chu inthlan kaihhnawiha an hman tur designated bank account hawntir vek niin, inthlan chuh tura hming an pek luh atangin candidate-te hi campaign-naa an sum hman dan uluk taka chhinchhiah leh vil zui reng an ni. Sum hman dan khuahkhirhna hi inthlan felfai leh thianghlim tak a awm theih nana ruahman a ni.