Inthlana duty tur police 2 thi Pakhat awmna chin hre lo

MLA inthlana duty tura chhuak tawh Mizoram Police pahnih chu dam lohna avang leh lirthei chetsualna avangin an thi a, Central Armed Police Force ami, inthlana duty tura rawn kal hnamdang pakhat chu chin hriat lohin a awm bawk.
Thudawn danin, Lawngtlai district Tuichawng Assembly bial ami, Jarulsury Polling Station chu pan harsa zual hmuna a tel avangin November 5 (Pathiannia) a chhuak zingah an tel a. Maxi cab-ah polling official pali leh security mi pahnih, driver nen an vaiin mi pasarih an chuang. Chawngte atanga km.20 vela hlaah kawng chhoah lirthei hi a tang a, an nawr chhuak thei mai loa, lirthei tawlhlet chu kawngthlangah liamin a nawrtu zing ami constable Z Lalmuanzuala (33), 4th IR Bn chu hnawl telin a hmunah a hliam tuar loin a thi. Midang hliam na an awm lo tih sawi a ni. Z Lalmuanzuala hi Lawngtlai Chanmari Veng mi a ni.
Lawngtlai district thuneitute chuan ruang phur tur tir nghalin, an chetsual dan kimchang zirchiang turin sector magistrate tirh a ni a. Sawrkar dan dinglai anga chhiat tawkte tana zangnadawmna awm theite sawiho niin, hliam tuarte enkawl zui dan tur rel a ni. Pathianni zan la la khan Jarulsury P/S-a duty thlaktu tur an ruahman a; an duty-na tur hmun an pan nghal a ni.
November 5 vek tlai dar 5.00 vel khan Champhaia inthlan duty tura awm mek constable Lalfakawma, 2nd IR Bn. chu dam lohna avangin Champhai District Hospital ah a thi bawk.
Hetihlai hian Mizoram inthlan duty tura rawn kal, Ngopa-a inkulh mek 9th Bn Assam Police ami, constable Sabeen Nath chu November 5 zing dar 7.00 vel atang khan a chin hriat a ni loa, amah hi zu avanga buai zauh zauh tawh niin, a zu nghei thut buai nia rin a ni. A silai a chhuahpui loa, police bakah Ngopa khawtlangin he chanchin buatsaih thleng hi chuan an la zawng mek a ni.