Investor-te chahluh state tan hmasawnna tur – DoNER secretary

Investor-te chahluh state tan
hmasawnna tur – DoNER secretary
State Planning department buatsaih, Aizawla neih North East Global Investors Summit 2023 chu Mizoram tana hmasawnna thlen theitu a ni tih DoNER seretary Lok Ranjan chuan a sawi.
Thuthar thehdarhtute a kawmnaah, Development of North Eastern Region (DoNER) chu hmarchhak state-te hmasawnna atana a bul tumtu pui ber a nih thu Lok Ranjan hian sawiin, State Investment Workshop for State preparedness on North East Global Investors Summit 2023 neih mekah Mizoram hotute leh ram pawn atanga investor lokalten investment tha tak an hmuh ngei a beisei tih a sawi. Hmarchhak state tin sawrkar hotute an tlawhkual tih sawiin, state hrang hrangah investor an hmuh nual tawh thu leh, hei hian hmarchhak state hrang hrangah hmasawnna nasa tak a thlen a beisei thu a sawi a ni.
Summit-ah hian private company hrang hrang chu thawhpuiah an sawm tih DoNER hotu hian a sawi a. Company bakah state sawrkar tana hlawkthlak tak a nih tur thu a sawi. Zirna in, damdawi in, hotel leh tourism chu a tam thei ang ber private-a kalpui tura invesment ti turin a sawm a. Hei hian thalai hna zawng mekte tan hna thar a siamsak dawn bakah mipui tan hlawkna leh awlsamna a thlen dawn tih a sawi.
Hmarchhak state-a sumdawnna chuan rah tha chhuah a, hmasawnna nasa tak a neih a beisei tih Lok Ranjan hian a sawi a. Ram tan hmasawnna nasa tak a thlen ngei a beisei thu a sawi bawk.
DoNER secretary hian chief minister Zoramthanga a kawmnaah Mizorama investment kawnga hmasawnna tur a sawipui a. Sawrkar laipuiin India hmarchhaka investor-te hnuhluh a, potential-te kawhhmuh chu a ngaihpawimawh tih a hrilh. Mizoramah pawh maua innghat industry tih len leh tourism leh hospitality chu pawimawh a tihpui thu a hrilh a. Education leh health sector chu investor-ten an ngaihven tih a sawi.
Chief minister chuan Mizoramah sumdawnna kawnga bul tan theihna kawng tam tak a awm tih sawiin, “State hmasawnna atan investor tha tak an awm a pawimawh a ni,” a ti. Mizoram chu state dangte nen khaikhinin mihring cheng an la tlemin ram ruak hman tangkai theih a la tam a, economy hmasawnna tur theihna a tha hle tih a sawi a ni.