IR Bn din hi kan tihsual lian AR ram luah kan bawhzui – Chief minister

Mizoram sawrkarin Indian Reserve Battalion a lo din ve chu state-in a tihsual lianpui a ni tih chief minister Lalduhoma chuan a sawi a. Police zingah thlamuanpui awm loh an tam tih a sawi. Assembly Session-a Home department chungchang sawinaah chief minister chuan IR Bn kan din chu kan ramin a tihsual lianpui, ‘blunder’ nia a hriat thu a sawi a. Din a nih dawnin Assembly House-ah din lo turin an ngen a. State sumin a tlin a nih chuan state sawrkar hnuaia awm tur Mizo battalion din zawk an rawt tih a sawi a ni.
“Khatihlaia sawrkar khan police lak an chak a, an mite thun an chak zek zek a; ti lo turin kan ngen a, an la inchhir tur thu kan hrilh a. Mah se, an tilui a, tunah chuan mi fahrawn enkawl ang kan ni a, mi fa kan chawm reng a ni. An chungah thuneihna pawh kan nei tak tak loa, kan titawp thei tawh si loa, a pawi khawp mai,” a ti.
IR batalion chu Mizoram ta a ni loa, kan thuhnuaia awm pawh an ni loa, duh duh hunah duh duh na hmunah sawrkar laipuiin a hmang thei a, a hmang bawk thin tih Lalduhoma hian a sawi a. Mizoram pawna hman an nih pawhin an senso leh an hlawh zawng zawng Mizoram sawrkarin a pek vek tho a ngai a, mi state-te police tur kan tum kep ringawt niin a sawi.
Kan police ho an thlamuan pui awm loh nia sawiin, “En reng reng pawhin thla an ti muang lo, an fit lo tihna a ni. Kut vung ber bur, ke vung ber bur, PSO atan pawha kan duh loh tur an la a, heng zawng zawng hi kan chhawm. Kan police tam tak hi an fit loa, phat tur a awm lo,” a ti bawk.
Assam Rifles sawn chungchangah eng chin chiah nge state sawrkarin tih ve tur a la neih a, tih loh a la neih palh em, tih file-ah a zawhtir mek a, official-in a hnen a la rawn thleng leh lo tih chief minister hian a sawi. An chhuahsan tur ram kan la chingfel lo hrim hrim bawk tih sawiin, tunah Assam Rifles ram luah chhunga ram nei mi 13-in sawrkar hnenah an LSC an dahlet tawh a, hei hi cancel a ni tawh a. Ti ve thei lo, show cause notice pek 41 an awm a, mi 10-in court-ah sawrkar an khing mek tih a sawi.
“Tun sawrkar tharin a ngaihtuah a, Revenue minister-in court-a kal leh show cause notice pek ho te lengah sawmin ram leh hnam tan an tlawmngaihna dil se, tha takin inbia se, kan ram tan chuan surrender thei an awm nual kan beisei a ni. Tha taka kan indawr a, tlawmngai thei lo an awm a nih chuan sawrkar chuan a thuneihna a hmang mai turah kan ngai,” a ti