Iran atangin US-in an airman chhanchhuak thei ta

Iran atangin US-in an airman chhanchhuak thei ta
Iran-in F-15 indo thlawhna a kah thlaksak hnua hmêlma ram china tla an airman chu US-in an chhanchhuak ta niin sorkar chuan Pathianni tuk khan a sawi a, President Donald Trump-a tan Iran laka indo a kalpui meka a chawlhkar ruknaah harsatna lian tak a tawh chu chin fel a ni.
Chhanchhuahna hi US tan chuan thil pawmawh tak niin indonaah hian mi sang tam tak an thi tawh a, energy-ah harsatna a thlen a, Iran-in Strait of Hormuz a khar avangin khawvel eibarah chhiatna a thlen mek bawk.
Trump-a leh Israel chuan Inrinni khan Iran chu strait hawng turin nasa zawkin an nawr a, khawvel tuialhthei leh liquefied natural gas phurh hmun ngaa thena hmun khat vel phurhna kawng hi an hawng lo a nih chuan an energy hmunhmate beih a nih tur thu an sawi.
US-in airman a chhanchhuah tak hi Zirtawpnia Iran-in an air defense hmanga a kah thlak indo thlawhnaa chuang pakhat zawk a ni a, Tehran leh US chuan nasa takin an zawng a ni.
White House Press Secretary Karoline Leavitt-i chuan X-ah Trump-a thuchhuah, “Darkar eng emaw zat kalta chhung khan US sipaiten US chanchina Search & Rescue Operation huaisen ber zinga mi chu an titawp ta,” tih chu a tar lang.
Hliam tuar mah se colonel chu ‘a tha leh mai dawn’ tih Trump-a chuan a sawi bawk.
Trump-a hian a thil phut tihhlawhtlin a nih loh chuan Iran power plant-te a kah dawn thu a sawi leh a, Tehran-in indona tihtawp tura inremna a siam theih hun chhung chu Thawhtanni chawhma dar 10:00 (India-a zan dar 07:30) vel a nih thu a sawi bawk.
“Iran hnena INREMNA siam nan emaw, HORMUZ STRAIT HAWN HUN emaw atan ni sawm ka pek kha hre reng a. Hun a liam zel — in chunga hremhmun a lo chhuk nan darkar 48 vel a la awm a. PATHIAN ropuina awm rawh se!” tiin Inrinni tuk khan Truth Social-ah a tar lang a ni.
Indona a zual zel karah Trump-a hian indawra hmasawnna tur a awm thu a sawi bakah Islamic Republic chu ‘Stone Ages’ huna kir leh tura bomb thlak tura vauna a tichhuak fo tawh.
Israel defence thuneitu sang pakhat pawhin kar leha Iranian energy hmunhmate beih tumin an inbuatsaih mek tih a sawi a, US phalna a nghah mek thu a sawi bawk.
Hetih lai hian Iran pawhin US leh Israel-in an beih a nih chuan ‘helai chhehvel pum hi in tan hremhmun a ni ang’ tiin a vau let niin Iranian chanchinbuten an tar lang.
Pakistan-in Washington leh Tehran inkara inremna siam tura inbiakna neih theihna remchang chu a tlem hle niin a lang mek a, ngaihdan lakah US mipuiten indo hi an thlawp mang lo bawk.
Iranian foreign minister erawh chuan inbe turin kawngkhar a hawng reng a. Abbas Araqchi-a chuan X-ah, “Kan ngaih pawimawh ber chu kan laka dan lova indona kalpui fel tak leh nghet taka tihtawp theihna tur thuthlung a ni,” a ti a. Islamabad-ah Iran a kal duh lo nia sawi chu phain hmalakna awm chu a lawmawm thu a sawi bawk.