Remna zawngin Afghanistan leh Pakistan inbe zel – China

Remna zawngin Afghanistan leh Pakistan inbe zel – China
Afghanistan leh Pakistan inbiakna chu a kal mek zel a, China chuan Asia chhim lam thenawm ram hnihte kum 2021-a Taliban-ten Kabul-a thuneihna an chan hnua an intihbuaina rapthlak ber tihtawp tumin an inbia tih Zirtawpni khan a sawi.
China-in khawthlang lama a ri ram hnihte hi tun hmaa tang dun thin niin an inhmelma ta a. Inremna siam tumin hma a la tan a, foreign minister-te telephone-in an inbia a, March thla khan tlawh turin palai an tir bawk.
Foreign ministry thupuangtu, Mao Ning-a chuan ni tin thuthar lakhawmtute a kawmna thinah, “Pakistan leh Afghanistan hian China-in inremna atan hma a lakna hi an ngai pawimawh a, inbiakna neih leh an duh a, hei hi thil tha tak a ni,” a ti.
Mao-a hian khawiah nge inbiakna neih a nih tih a sawi lo va; mahse, a thenawm ramte chuan chhimthlang lam khawpui, Urumqi-ah an awm tih an lo sawi tawh thung.
China hian inbiakna atan hian palai hna thawkin a dawr kual a, boruak tha siam leh indawr theihna tur siam turin ram pahnihte tan a bei niin Mao-a chuan a sawi a, ram pathumte chuan a hun takah thu chiang zawk an tichhuak dawn tih a sawi bawk.
October thla atanga Pakistan leh Afghanistan inkara indona intan hian lehlam lehlamah tam tak an thi tawh a, Afghan-te an buai phah hle bawk.
Islamabad chuan Afghan Taliban-te hian Pakistan beih thintu Islamist firfiakte an kawl niin a puh a, Kabul-in a hnial ve thung a, firfiak chetna chu a thenawm ram chhung buaina a nih thu a sawi.