Iran hmunhmate kan endik dawn – UN nuclear chief

Khawvel huapa nuclear thlithlaitu pawl hotu chuan Iran-in US nena remna thuthlung hmasa an siam angin an ramah endikna an neih tur thu a sawi.
International Atomic Energy Agency (IAEA) Director General Rafael Grossi-a chuan Japan-a thuthar thehdarhtute a kawmnaah, “Endik a thleng dawn,” a ti a. “A hun, kalpui dan tur leh a hmun turte kan buaipui thuai dawn a ni,” a ti.
Kar hmasaa inremna an ziahah khan Iran-in uranium a tihchakte tihdal tur chu IAEA enpuina hnuaia kalpui a nih tur thu ‘chiang takin’ a inziak tih a sawi bawk.
Hetih lai hian Iranian deputy foreign minister chuan a nuclear facility chhia leh nuclear hmanruate hmuh theihna tur chu US nena inremna tak tak an siamah chauh ngaihtuah a nih tur thu a sawi ve thung.
Grossi-a hian he thu hi US Secretary of State Marco Rubio-a’n Gulf ramte tlawha inremna chungchang a sawipui laia a sawi a ni a. Nilaini khan UAE President Mohamed bin Zayed Al Nahyan a hmu a, Kuwait leh Bahrain-ah a tlawh dawn bawk.
US leh Iran inremna hmasaah hian Iran-in lawngte chu Strait of Hormuz paltlang a phalsak dawn tih tar lang a ni bawk a, US chuan Iranian lawng chawlhhmuna a kharsakte a hlip ve thung ang.
tun hnaiah US leh Iran inkarah hian UN nuclear endututen an endik tur chungchangah inhnialna a chhuak a. thawhtannia Switzerland-a Iran palai hotu nena an inbiak hnuah US Vice-President JD Vance-a chuan Iran hian ‘IAEA inspector-te chu an rama lut leh turin a remti’ tih a sawi.
A tuk zingah Iranian foreign ministry thupuangtu chuan ‘sawihona chiang a la awm lo’ tih sawi ve nghalin IAEA endiktute chu June, 2025-a ni 12 chhung Israel leh Iran indonaah US-in a bomb chhiat nuclear hmuna luh phalsak an tum loh thu a sawi bawk.
Hemi hnu hian US President Donald trump-a’n Iran-in ‘a kalh zawnga a awm leh thu dik lo a sawite’ chu a hnawlsakin endikna kalpui turin ‘an remti’ niin a sawi.
IAEA hotu chuan, “Inhnialna a awm a. thenkhatin ‘ni’ an ti a, a dangin ‘ni lo’ an ti bawk a. Politic-a thu sawi hi ka hrethiam vek a, a peng pakhat a ni a. thil tak tak zawk erawh chu president pahnihte hian inremna thuthlung an ziak tawh a ni,” a ti.
“Chiang takin nuclear hnathawh tur, nuclear hmanrua, hmunhma te pawh IAEA-in a enpui dawn tih a sawi a, chiang taka ziah a ni a, hei hi a thleng dawn,” a ti a. Iranian sorkar nena thawhhona hnuaia endik a nih tur thu a sawi bawk.
February 28-a US-Israel leh Iran indona a chhuah hma khan IAEA chuan Iran hian uranium kg 440 a nei tih a tar lang a, hei hi 60% thlenga tihchak a ni a, ralthuam atana hman tur tling teuh tak a ni a. theory phei chuan a tawk a, 90% thlenga tihchak a nih chuan bomb 10 vel siamna daih a ni.
Iran chuan an nuclear buaipui chu a muanawm zawnga kalpui a nih thu leh ralthuam siam leh neih a tum ngai dawn lo tih a sawi ve reng thung.