Iran laka chet dan turah Trump-a’n mi a rawn mek

Iran laka chet dan turah Trump-a’n mi a rawn mek
President Donald Trump-a chuan Iran laka chet a lak dan turah, a bikin sipai chakna hmanga beihna turah mi a rawn mek niin Department of Defense-a hotu sang pahnihin an sawi.
Ral hla tak kap thei chi missile hmanga beih chu tuna US-in chet a lak theihna awm chhin nia hriat a ni a; mahse, Pentagon hotu sangte chuan cyber operation leh psychological campaign hmanga chhan pawh a ni thei tih an sawi thung.
Iran-ah hian mipuiten chawlhkar thum chhung sorkar laka lungawi lohna an lantir tawh a, sorkar chuan a beih letnaah mi 600 chuang an thi tawh niin mihring dikna chanvo humhalhtuten an sawi a. Trump-a hian Thawhtanni khan Iran nena insumdawn tawnna nei ramte lakah chhiah 25% a lak dawn thu a puang.
Iranian foreign minister chuan Tehran chu Washington nena inbe turin a inpeih tih a sawi a; mahse, ‘indo turin a inbuatsaih’ tih a sawi bawk.
Trump-a national security team chu Thawhlehni (India-a zan lai)-ah Iran chungchang sawiho turin White House-ah an thukhawm dawn nia sawi a ni a, president hi a tel dawn em tih erawh he chanchin ziah lai hian a chiang lo.
President hian lungawi loh lantirtute thah an nih zel chuan sipai chakna hman chu ‘an duhthlan tur na tak’ a nih theih thu a lo sawi tawh a. Iranian hruaituten ‘indawr turin’ an bia a; mahse, US chu ‘inbiak hmain a che dawn’ niin a sawi thung.
Iran-ah hian an pawisa hlutna nasa taka tlahniamin eibarah an hniam em avangin mipuiin puithiam roreltu, Supreme Leader Ayatollah Ali Khamenei-a laka lungawi lohna an lantir nasa hle a ni.
Thawhtanni khan White House Press Secretary Karoline Leavitt-i chuan Iranian thuneituin Trump-a palai, Steve Witkoff-a pawh a bia tih a sawi a, Tehran-a mipui tanna hi ‘thuneituten an hriat chin bak thil awm’ niin a sawi.
Hetih rual hian US president chu ‘a tul nia a hriat chuan sipai chakna hman hreh miah lo’ a nih thu a sawi bawk.
CBS-in a kawm, ram himna lam ngaihtuahtu zinga pahnih chuan US sipaite Iran-a an chetna tur ni thei ber chu van sang atanga kah a ni tih an sawi a, Iranian sipai hmunpui leh inbiakpawhna lam tihbuai tum a nih a rinawm thu an sawi.
US hian Iran-a a khua leh tui awmte chu chhuak turin a ti a, US sorkar puia awm lote chu a rang thei anga chhuak turin an ti a ni.
Hetih lai hian Khamenei-a chuan US chu ‘mi thah tum’ tiin a sawi a, Thawhtannia Iran hmun hrang hrangah sorkarin a huaihawt sorkar thlawpna lantirna chu tha a tih thu a sawi bawk.
Sorkar chanchinbu chuan Thawhtanni khan Iran hmun hrang hrangah sorkar thlawpna lantirin mi tam tak an pungkhawm tih an sawi a. Hetih lai hian BBC Persian chuan he hunah hian mi tel turin text message hmanga sawm an ni a, sorkar duh lohna lantirnaa kal lo tura tih an ni bawk niin a tar lang.
Thawhtanni vek khan Trump-a chuan a Truth Social platform-ah Iran nena sumdawnna kalpui ramte bungrua a lak luhah chhiah 25% a lak thu a puang a, a sawi zau lo thung.
Iran hi US hrekna na tak tuar lai niin an pawisa hlutna a tlahniam a, thil man a sang a, ei leh in phei chu 70% thlengin a to tawh a. Ei tur hi hmun thuma thena hmun khat hi ram dang atanga an lak luh a ni a, chhiah lak avanga inkhuahkhirh zel a nih chuan a harsa leh zual dawn a ni.
White House chuan chhiah laksak tur hi engmah a la sawi lo va. China hi Iran-in a sumdawnpui ram lian ber niin Iraq, United Arab Emirates, Turkey leh India chu a lian pawl an ni bawk.
Norway-a mihring dikna chanvo humhalhtu pawl, Iran Human Rights (IHRNGO) chuan sorkar duh loh lantirnaah hian mi 648 vel an thi tawh a, an zinga pakua hi kum 18 hnuai niin an sawi a. A tak taka a zat phei chu hei aia a tam an ring.
Iran-ah hian ram dang chanchinbu mite luh theih a nih loh avang leh Ningani zan atanga internet an tihtawp avangin thil thleng tak tak hi hriat a harsa hle rih a ni.