Iran leh US-in inkahhai remti
Iran leh US-in inkahhai remti
Iran leh US chuan chawlhkar hnih chhung atan inkahhai an remti a, hemi chhung hian Strait of Hormuz kaltlanga lawng kal phal a ni bawk ang.
US leh Israel tang dunin Iran an beih atanga thla khat chuang zet hnua kalpui tur a ni a, US President Donald Trump-a’n Iran-in Strait a hawn leh loh chuan ‘zanin hian khawsakna zawng zawng a thi ang’ tia a vau hnu darkar eng emaw zatah puan a ni.
Pakistan Prime Minister Shehbaz Sharif-a chuan inbiaknaah palai hna a thawk a, Nilaini zing atangin inkahhai kalpui tan nghal a nih thu a sawi.
Trump-a chuan Tehran-in Gulf atanga tuialhthei leh thil dang thawn chhuahna atana lawng kalna kawng pawimawh tak, Strait of Hormuz hawn leh a remti a nih chuan, “Iran-a bomb puak leh beih chu chawlhkar hnih chhung atan tihtawp’ a remti tih a sawi.
Truth Social-ah inkahhai hi a remti tih a sawi a, ‘sipai hmanga thil tum zawng zawng kan hlen chhuak tawh a, kan pel tawh’ tih a tar lang.
Hemi hma hian US chuan Iran chu ‘zan khatah’ a nuai chimit vek thei tih a lo sawi tawh a, ‘zanin hian kir leh tawh ngai lo turin a vaiin a thi ang’ tiin a sawi bawk a, hei hi UN hotu leh Pope ten an dem hle.
Iran chuan Hormuz Strait-a lawngte chu chawlhkar hnih chhung kal tlang phalsak a remti a, an kalna tur hi Iranian sipaiten an enpui ang.
Iran hian point 10 awmna ruahmanna a siam bawk a, heng zingah hian thil dang bakah Iran, Iraq, Lebanon leh Yemen-a indona tihtawp vek a ni a; Iran hrekna hlih tura ‘intiamkamna’ neih; Iran sum leh pai leh US-in a neih a hrek chhuah zalen; leh Iran hnenah ‘in sakna senso atanga zangnadawmna pek’ a tel.
‘Iran-in nuclear ralthuam a neih lohna tura intiamna’ a tel bawk.
Sharif-a sawi danin inkahhai hi Lebanon-ah pawh hman a ni dawn a, he hmunah hian Israel chuan Iran thlawp firfiak pawl, Hezbollah a bei mek a ni.
Israeli hruaitute chuan Hezbollah atanga hlauhawmna tihbo a nih hma chuan Lebanon an chhuahsan loh tur thu an sawi thin a. Lebanon-ah emaw, hmun dangah emaw a hmalakna tihtawp a remti tih hriat a la ni lo.
Trump-a’n inkahhai a puan hnu lawkah Israel-ah siren a ri a, Israel Defence Forces-te chuan Iran atanga missile kahchhuahte chu an lo kap thla niin an sawi.
Thawhlehni zan tlai tawh takah khan Jerusalem hmun hrang hrangah puak ri eng emaw zat a awm.
Trump-a’n inkahhai a puan atanga darkar tlem te hnuah Israeli Prime Minister Benjamin Netanyahu-a chuan, “Iran-in Strait a hawn nghala US, Israel leh he biala ramte beihna zawng zawng tihtawp a nih chuan President Trump-a’n Iran laka beihna tihtawp a tum chu Israel chuan a thlawp a ni,” a ti.
Thuchhuah chuan ‘inkahhaiah hian Lebanon a tel lo’ tih a tar lang bawk a, Israel hian he ramah hian sipai a dah a ni.
Trump-a thutlukna siamnaah hian Netanyahu hi engtiang chiahin nge a inrawlh tih erawh a chiang lo.
Inkahhai a awm theihna atana hma latu, Pakistan chuan palaite chu Zirtawpnia Islamabad-ah inbe turin a sawm a, ‘inmil lohna zawng zawng chin felna tura inremna felfai siam tura inbiakna nei zel turin’ a sawm.
White House Press Secretary Karoline Leavitt-i chuan mi mal inbiakna chungchanga sawihona kalpui mek chu a pawm a; mahse, ‘president emaw, White House emaw-in an puan hma chuan thutlukna siam a ni tihna a ni lo’ tih a sawi.
Inremna tak tak siam tura indawrna hi a khirh hle tura ngaih a ni a. Ram pahnihte hian inkahhai hian eng nge a ken tel tih chungchangah dinhmun inang lo tak an nei a. Iran leh US hi kum kalta chhungin vawi hnih an inbe tawh a, heng inbiak lai hian sipai inkara buaina a zual zel a ni.