Iran leh US te Oman kaltlangin inbia

Iran chuan United States nen Sultanate of Oman kaltlangin nuclear deal leh lung in tang inthleng chungchangah inbiakna an neih mek thu a sawi.
Iran nuclear programme chu Western powers tena an ngaihmawh em em ni rengin hei vang hian hrekna kalpui a ni a, chu chuan Iran economy a khawih na hle a ni.
Kum 2015 khan inremna siam niin Tehran chuan a nuclear programme kalpui nasa taka a tihtlem avangin hrekna tam tak hlihsak a ni a, mahse, kum 2018 khan chu inremna atang chuan US a inhnukdawk leh ta a ni.
Tun hnaiah inbiakna neih niin kum 2015 accord siam thlaktu tur a thar duan mek a ni tia media report erawh Washington leh Tehran chuan an hnawl ve ve thung a.
“Omani officials tena an hmalakna hi lawmawm kan ti a, palai kaltlangin US hrekna hlih a nih theihna tur kawng ngaihtuahho mek a ni,” tiin Iran Foreign Ministry thupuangtu Nasser Kanani chuan a sawi a.
“Diplomacy lama inbiakna kan titawp ngai lo,” tia sawi bawkin “A rukin engmah kalpui kan nei lo,” a ti zui bawk.
Tehran leh Washington inlaichinna hi kum 1980 atang khan kum 1979-a Iran supreme leader hmasa ber Ayatollah Ruhollah Khmeini an Islamic revolution a kalpui atanga chhe tan a ni a.
Kum 2015 Tehran nuclear deal tharthawh leh tuma hmalakna pawhin rah tha a chhuah hleithei ngai lo. Hetih lai hian Iran supreme leader Ayatollah Ali Khamenei chuan Iran-in nuclear industry a neihsa te tichhe kher lo a nih chuan inremna a awm thei ang tiin a sawi.
Nuclear bakah hian US leh Iran te chu Oman kaltlangin lung in tang inthleng dan tur an ngaihtuah bawk a. Kanani chuan Washington-in Tehran-ina a ngaih thutak anga thil a kalpui a nih chuan lung in tang inthleng a awm thei tiin a sawi.
Iran-ah hian Iranian-Americans pathum an tang anga ngaih a ni a, chung zingah chuan sumdawng Siamak Namazi, October 2015 a man leh enthlatu tia puha kum 10 lung in tang tura tih a tel a.
Tun hnaiah Iran chuan Euroepan khua leh tui paruk a chhuah zalen a, chutihrual chuan Belgium-a firfiakna kaihhnawiha lung in tang Iranian diplomat Assadollah Assadi chu chhuah zalenin a awm bawk.
Kanani chuan Iran-in Russia hnenah drone factory dinna tur ralthuam leh hmanrua a pe tia puhna chu a hnawl bawk.
White House national security spokesman John Kirby chuan Russia chuan Iran hnen atangin drone factory dinna tur a dawng tiin a sawi a. “Ukraine indonaa hman tur Russia hnenah ralthuam kan pe tia puhna hi kan hnawl a ni,” tiin Kanani chuan a sawi.