Iran Supreme Leader Khamenei-a a inlan leh ta

Iran Supreme Leader Khamenei-a a inlan leh ta
Iran-a Supreme Leader Ayatollah Ali Khamenei-a chu Israel nen an ram an indo hnua a vawi khat nan vantlang zingah a inlan leh ta niin an sorkar chanchinbuin a tar lang.
Sorkar television-in a tihchhuahah Inrinni khan Shia kût, Ashura hma ni chiaha mosque-a kal khawmte chibai a buk a ni.
Khamenei-a hi hmuh a nih hnuhnung ber chu June 13 atanga Israel nen an indova Iranian sipai commander lawk leh an nuclear scientist thah an nih laia a video record tihchhuah kha a ni.
Israel hian Iran-a nuclear leh sipai hmunte a bei thut a, Iran pawhin a chhang let zui.
Ni 12 an indo chhungin Khamenei-a hi TV-a video thuchah vawi thum a sawi a, hmun biru takah a awm nia ngaih a ni.
Inrinni khan Iranian chanchinbute chuan Khamenei-a inlan leh hi an tichhuak nasa hle a, amah thlawptute pawh television-a an hmu leh hi an hlim hle.
Khamenei-a hi puithiam hlun tak, Mahmoud Karimi-a nen lang dunin an hnam hlan, ‘O Iran’ an sa a. He hla hi Israel nen an inkar a chhiat laia an sak fo thin a ni.
Sorkar TV chuan video-a lang hi Islamic republic dintu hming chawia a hming phuah, Tehran-a Imam Khomeini Mosque-a mi a ni tih an sawi.
Ashura hi Muharram atanga ni 10-ah hman thin niin kuminah July 6 a ni a, Shia Muslim-ten Prophet Muhammad-a tupa, Hossein-a thih cham an hriat rengna ni a ni.
June 26 khan a hmaa lo record tawh video chu sorkar television-a tihchhuah niin hetah hian Khamenei-a hian Iran chu US President Donald Trump-a’n nawr mah se Israel lakah a tlawm dawn lo tih a sawi a ni.
US hian Israel-in Iran a kahna chhunzawmin June 22 khan Iranian nuclear hmunpuite a kap ve leh a. Hetah hian US sipai thlawhna 125 thawk chhuakin Fordo, Natanz leh Isfahan an kap.
Iran-a thuneitute chuan ni 12 indo chhung khan mi 900 chuang an thi niin an sawi.