IRGC te Canada-in firfiak pawlah puang

Canada chuan Iran sipai Islamic Revolutionary Guard Corps (IRGC) chu terrorist organisation tiin opposition legislator leh Iranian diaspora tena an dodal chungin a puang.
Public Safety Minister Dominic LeBlanc chuan sorkar thutlukna chu ‘global terrorism beih nana thil pawimawh’ tiin a sawi zui a.
Canada thutlukna siam avang hian senior Iranian government official tam tak, IRTGC official lawkte ang chu Canada an luh remtih a ni dawn lo a ni.
Iran foreign ministry chuan na taka sawisel nghalin ‘finthlak lo leh tul lo’ tiin a sawi a.
IRGC hi Iran a military, political leh economic fo5rce niin Supreme Leader, Ayatollah Ali Khamenei nena inzawmna thuk tak nei a ni a.
IRGC hian sipai 190,000 vel nei mekin ground forces, navy leh air force te nei vekin Iran strategic weapons te an kutah a awm vek a ni.
IRGC te hian Middle East-ah sum, ralthuam, technology, training leh advice pe in an thawhpui sorkar leh armed group-te chu an pui nasa hle a, ram pawn lama operation anneih kalpuitu ber chu Quds(Jerusalem) Force te an ni bawk.
Quds Force te hi Canada-in terrorist group-a a dah tawhsa niin tunah erawh IRGC pum chu terrorists-ah a puang ta a ni.
LeBlanc chuan Canada chuan IRGC hmanga firfiakna kalpuina chitin chu a beilet tawh dawn a ni a ti a. “Iranian regime te hian human rihgts pawh Iran ram chhung leh pawnah zahna an lantir ngai lo va, international rules-based order pawh an pawisa hek lo” tiin a sawi.
Canada thutlukna siam hnuah senior Iranian government official tanglai mek leh lo ni tawhte tuna Canada a awm mek te pawh chhui chian an nih phah thei tawh dawn a ni.
Canada foreign affairs minister Melanie Joly chuan Iran a Canadians awm mek te chuan he thutlukna avang hian harstana an tawk thei a ti a. “Ka sawi duh chu Iran a awm mek te lo haw rawh u tih leh Iran kal tum te kal suh u tih a ni” tiin a sawi.
Iran foreign ministry thupuangtu Nasser Kanaani chuan Canada thutlukna siam chu finthlak lo leh tul lo politics thila hmalakna tiin a sawi a. “Canada thutlukna siam hian Revolutionary Guard akhawih hauh lovang” tiin a sawi.
Prime Minister Justin Trudeau kaihhruai Canada sorkar chuan a hmain January 2020-a Tehran-a IRGC tena Canada passenger phur thlawhna Flight PS752 IRGC tena an kahthlak avanga a chunga passenger 175 an thih vek hnuah IRGC te terrorist a puang tura nawrna chu an lo hnawl tawh zawk a ni. Kha thlawhna kahthlak khan Tehran chuan tihpalh thiltih tiin an sawi a ni.