Iron Man lem lanna hmasa ber milembu an hralh to

Marvel Comics hero Iron Man milem lanna hmasa ber, milembu phek khat chu Heritage Auctions-in an lilam a, dollar maktaduai 3.875-in an hralh! Hei hi original comic art hralh to ber a la ni.
Heritage Auctions chuan Don Heck artwork original, March 1963-a tihchhuah, milembu ‘Tales of Suspense No.39’ phek khatna (page 1) chu lilamin, hei hi khawvelin Iron Man milem a hmuhna hmasa ber a ni a, dollar maktaduai 3.875 lawihin an hralh thei a, “Milem ropui tak leh history bu inpawlh hi record siam khawpin kan hralh a ni,” an ti.
Heritage Auctions-a director of comics & comic art Joe Mannarino chuan, “Marvel milembu hmasa te kha hmuh tur a awm tawh mang lo a. Hetianga rin loh taka a rawn lan ve leh nawlh hian a hralhna lamah buaina a awm lo, a market tur hi a lo inhawng zau nghal em em mai a ni,” a ti.
Mannarino chuan an lilamnaah pawh hian a man a san deuh tak tak chinah mi paruk an inthlur ta a, an inlan zak zak a, dollar maktaduai 3.875-in a tawpah an hralh ta niin a sawi a, mahse, he milembu phek khat hi a leitu erawh an puangzar lo.
Hei hi original comic art an hralh to ber a la ni a, a hmaa hetiang record siamtu chu Mike Zeck art, 1984-a Marvel Super-Heroes Secret Wars No.8 niin, he artwork hi Spider-Man costume dum a lanna hmasa ber a ni a, January 2022 khan dollar maktaduai 3.360-in an hralh.