Iron Rod size tling lo hralh chungchang

Nimin khan supply minister B.Lalchhanzova hovin Mizorama rod size tling lo zawrh thin tihtawp dan tur chungchang sawi ho a ni a. An thurel ang chuan, Iron Rod zuartu company-te hnenah rod size dik chauh Mizorama rawn la lut tura hriattirna leh vaukhanna ziaka pek ni se, tih a ni a. Mizorama rod size dik lo zuarte leh chutiang ti tura hma latute zawng chhuak tura chak taka hmalak ni se tiin an rel a. Hriattirna tihchhuah a nih hnu pawha ti lui te chu rod zuar an ni emaw, rod company an ni emaw, an chungah hremna lek ngei ni rawh se, tiin an rel a. Mipui te pawh rod man tlawm ringawt um lo turin an ngen nghal bawk a ni.
Iron rod size tling lo chungchang hian tunhma atang tawhin ngaimawh a hlawh a, sawrkar leh pawl hrang hrangte pawhin an lo buaipui tawh a. Kum 2023 kum tir lam khan Legal Metrology lam chuan thupek khauh tak a lo tichhuak tawh bawk a. Thupek chhuah a nih chhan hi, local market-ah standard size tling phak lo, buk zang zawk leh tê zawk a tam tih hmuhchhuah vang a ni. Thupek ang chuan, iron rod te hi Legal Metrology Wing, FCS&CA Department-in a dik ngei tih a finfiah Electronic Weighing Machine chauh hmanga a rih zawng buk hnua hralh tur, tih a ni bawk.
He thupek chhuah atang hian kum thum zet a vei leh ta a, tunah a ngai te bawkin Iron Rod size tling lo hralh chungchang hi ngaihtuah thar a lo ngai leh ta a. Hetianga minister ho meuhva rel a ngaih leh chhan hi, kha kum thum chhung khan sawrkar thupekin zawm a hlawh zui lova, a ngai te bawkin iron rod size dik lo hralh a ni zui zel tihna a ni ber a. Kha kum thum chhung khan thuneitute pawhin iron rod hralh chhuah chungchangah hian dik lo taka hralh chhuaktu eng zat nge an man tawh a, eng thubuai te nge ziah luh a nih a, eng hremna nge kenkawh a nih tawh tih hi tarlan tur an nei miah lo tihna em ni ang?
Thil han rel mai te, han sawi ho mai te hi kan taima a, a thu chuan a thain a ropui thin khawp mai, mahse kan thurel te a hlawhtlin zui leh hlawhtlin zui loh lam hi chu kan bengkhawn zui em em vak tawh ngai lo a ni ber awm e.
Hetiang thu rel a nih tawh chuan, vawiin atang hian iron rod zuartute endik hna runpui neih nghal a, a dik lo chu man chhuah a, tuna an rel ang taka hma lak zui mawlh mawlh nghal tur niawm tak a ni. Vaukhanna pek chhungin iron rod tling lo tam tak hi in sak nan kan lo hmang hman leh palh hlauh ang tih a hlauhawm alawm maw le!