iruk tibo tura intiam ZPM-in ram hruaitu ah a fihlim lo dah – Dr Lalmalsawma

Eiruk tibo tura intiam ZPM-in
ram hruaitu ah a fihlim lo dah
– Dr Lalmalsawma
Eirukna tihbo tuma manifesto-a dahtu ZPM chuan ram hruaitu ah eiruknaa fihlim lo an dah tih Congress hruaitu Dr Lalmalsawma chuan a sawi.
MPCC treasurer Dr Lalmalsawma Nghaka chuan, ZPM party manifesto chapter IX hnuaia point (L) ah, eirukna tibo tura nasa taka hma lak a ni dawn tih dah a ni a. Hetihlai hian Special Court (Prevention of Corruption Act) in corruption case-ah kum 4 tang a, cheng nuai 4 chawi tura a tih Pu V Zirsanga chu ZPM hotuten LADC chief executive member-ah an dah leh si niin a sawi.
2024 February 7-a ZPM Thalai press statement-ah Pu V Zirsanga demna thu sawiin, ram leh hnam ang pawhin a timualpho a, ram rorelna sang ber a tizahawm loin a tibawrhbangah an ngai tih a sawi tih sawi chhawngin, “Eirukna laka fihlim loin, ram hruaitu lu ber nihna chelh chhunzawm a tum zel mak an tih thu ZPM Thalai-in an sawi ngeia chu ZPM hotute chuan CEM atan an dah leh si,” a ti.
Lalna leh thuneihna an neih theihnan chuan Special Court-in thiamloh a chantir tawh pawh Lairam lu ber ni tura an la dah zel chuan corruption engahmah an ngaihloh zia a tichiang hle tih a sawi a ni.
Hemi kaihhnawih Assemby House-a sawichhuahah Lawngtlai West bialtu MLA Pu C Ngunlianchunga hnenah House leader, chief minister ni bawkin a zawhna lakpen tuma anticipatory bail la tura thu a rawn chu House zahawmna a tihbawrhban phah hle in an hria tih MPCC treasurer hian a sawi a. Mahni MLA pui thamlo tak leh invauna anga ngaih theih thil kha thleng tawh lo se an ti hle tih a sawi.
Chief minister hnenah zawhna pathum an nei tih sawiin, “2024 September 13 khan chief minister hian Pu V Zirsanga phone-a bia in, a hoa LADC-a sawrkarna siam an duh tih a hrilh chu thudik a ni em tih mipuiin kan hre duh a ni,” a ti.
A hnua Pu V Zirsanga’n a sawi lehnaah CM nen an inbiaknaah hian a personal thil bakah provincialised school 18 LADC kuta hlan, Ngengpui Wildlife Sanctuary leh Phawngpui National Park LADC kuta hlan, officer post 20 dawn lakna tur permission pek, CEM bangla tur SASCI hmanga thawh nghal a tiam em tih mipui hmaa puang turin an ngen tih Dr Lalmalsawma hian a sawi.
“Pu Ngunlianchunga hian anticipatory bail la turin khawi court-ah nge thubuai a neih mipui min hrilh turin kan duh,” a ti bawk.